SALM 86 - Khasi CL Bible (BSI)

Ka jingduwai ban ïoh jingïarap

¹ To shahshkor ïa nga, A Trai, bad to jubab ïa nga, naba nga long u bymdonbor bad uba tlot.

² To pynim ïa nga na ka jingïap, namar nga long uba kohnguh ïa me; to pynim ïa nga, naba nga long u shakri jong me bad nga shaniah ha me.

³ Me long U Blei jong nga; kumta to isynei ïa nga; nga duwai sha me baroh shi sngi.

⁴ To pynlong ïa u shakri jong me uba kmen, A Trai namar ki jingduwai jong nga ki kiew sha me.

⁵ Me long uba bha ïa ngi bad uba map ei, uba shlei da ka jingieit baneh ïa kito baroh kiba duwai sha me.

⁶ To shahshkor, A Trai, ïa ka jingduwai jong nga; to sngew ïa ki jingkyang jong nga ban ïoh jingïarap.

⁷ Ha ki por jingjynjar nga khot kyrpad ïa me, namar me jubab ïa ki jingduwai jong nga.

⁸ Ym don u blei kum ma me, A Trai, ym don uba leh kum kaei kaba me la leh.

⁹ Baroh ki jaitbynriew ba me la thaw kin wan bad dem ngon ha khmat jong me, kin ïaroh ïa ka jingkhraw jong me.

¹⁰ Me long uba donbor bad me leh ïa kiei kiei kiba phylla, tang ma me hi me long U Blei.

¹¹ To hikai ïa nga, A Trai, ïa kaei kaba me kwah ïa nga ban leh, bad ngan kohnguh hok ïa me; to hikai ïa nga ban shakri ïa me da ka jingshakri ba aiti lut.

¹² Ngan ïaroh ïa me da ka dohnud jong nga baroh, A Trai U Blei jong nga; ngan pynbna ïa ka jingkhraw jong me junom.

¹³ A katno kaba khraw ka jingieit baneh jong me ïa nga! me la pyllait im ïa nga na ka jingtep hi.

¹⁴ Ki briew basarong ki wan pyrshah ïa nga, A Blei; ka kynhun ki riewrunar ki pyrshang ban pynïap ïa nga — ki briew ki bym ju sngap ïa me.

¹⁵ Hynrei ma me, ko Trai, me long U Blei uba isynei bad uba ieit, uba ïaishah borabor, uba ïai lehsbun bad uba ïaineh.

¹⁶ To phai sha nga bad to isynei ïa nga; to pynkhlaiñ ïa nga bad to pynim ïa nga, namar nga shakri ïa me, kumba ka kmie jong nga ka leh.

¹⁷ To pyn-i ha nga ïa ka dak jong ka jingbha jong me, A Trai; kito kiba isih ïa nga kin ïoh lehrain haba ki ïohi ba me la ai ïa nga ka jingpyntngen bad ka jingïarap.