SALM 85 - Khasi CL Bible (BSI)

Ka jingduwai na ka bynta ka jingbha ka jaitbynriew

¹ Ko Trai, me la isynei ïa la ka ri; me la pynriewspah biang ïa ki Israel.

² Me la map ïa ki pop jong ki briew jong me, bad me la map noh ïa ki jingbakla jong ki baroh.

³ Me la sangeh ban bitar ïa ki, bad me la phai noh na ka jingbitar shla jong me.

⁴ To wallam pat ïa ngi, A Blei u nongpynim jong ngi, bad sangeh na ka jingbymsngewbha ïa ngi!

⁵ Hato men bitar ïa ngi junom? Hato ka jingbitar jong me kan ym kut shuh?

⁶ To pynlong khlaiñ pat ïa ngi, bad ngi ki briew jong me ngin ïaroh ïa me.

⁷ Pyni ha ngi ïa ka jingieit baneh jong me, A Trai, bad to ai ha ngi ïa ka jingïarap bapynim jong me.

⁸ Nga shahshkor ïa kaei kaba U Trai U Blei u ong; u kular ïa ka jingsuk ha ngi, ki briew jong u hi, lada ngim leit phai pat sha ki lynti ba-bieit jong ngi.

⁹ Da shisha u kloi ban pynim ïa kito kiba pyndonburom ïa u, bad ka jingdon ryngkat kaba pynim jong u kan ïoh shongsah ha ka ri jong ngi.

¹⁰ Ka jingieit bad ka jingïaineh kin ïashem; ka hok bad ka jingsuk kin ïakdup.

¹¹ Ka jingïaineh skhem jong u briew kan kynjoh shajrong na ka khyndew, bad ka hok U Blei kan khmih arsut na bneng.

¹² U Trai un pynlong pynmanbha ïa ngi, bad ka ri jong ngi kan pynmih kyrhai ki jingot.

¹³ Ka hok kan leit ha shuwa jong U Trai, bad kan pynkhreh ïa ka lynti ïa u.