SALM 83 - Khasi CL Bible (BSI)

Ka jingduwai na ka bynta ka jingshahjop ki nongshun jong ki Israel

¹ A Blei, wat shu sngap; wat sngap jar, bad wat long jar jar!

² Ha khmih! ki nongshun jong me ki la khihwin; bad kito kiba shun ïa me ki ïeng ïaleh pyrshah.

³ Ki ïathaw buit sianti pyrshah ïa ki briew jong me; ki ïasylla lang pyrshah ïa kito kiba me ïada.

⁴ “Ale,” ki ong, “ïa ngin pynduh noh khoit ïa ka hima jong ki; khnang ba yn klet noh junom ïa ki Israel.”

⁵ Ki ïamynjur halor ka jingthmu jong ki; bad ki pynlong ka jingïateh lok pyrshah ïa me.

⁶ Ki briew jong ka Edom bad jong ki Ishmael, ki briew jong ka Moab bad jong ki Hagrit;

⁷ ki briew jong ka Gebal, ki Ammon, bad ki Amalek, ki Philistia bad ki Tyros;

⁸ ki Assyria ruh ki la ïasoh lang bad ki; kum ki nongkyrshan kiba khlaiñ jong ki Ammon bad ki Moab ki khun ki ksiew jong u Lot.

⁹ To leh ïa ki kaei ba me la leh ïa ki Midian, bad ïa u Sisera, bad ïa u Jabin ha ka wah Kishon,

¹⁰ Me la jop ïa ki ha Endor, bad ki met jong ki, ki la pyut ha ka khyndew.

¹¹ To leh ïa ki nongïalam jong ki kaei ba me la leh ïa u Oreb bad u Seeb, To jop ïa ki nongsynshar jong ki baroh Kumba me leh ïa u Sebah bad u Salmunna,

¹² kiba la ong, “To ngin ïashimkynti ha lade ïa ka ri kaba dei ka jong U Blei.”

¹³ To pynsakma ïa ki kum ïa u pui pui, A Blei, kum ïa u phlangïap ba rong ka lyer.

¹⁴ Kumba ka ding ka thang ïa ka khlaw, kumba ka thylliej ding kaba wiang ïa ki lum,

¹⁵ to beh krad ïa ki da ka 'erïong jong me, bad pynsheptieng ïa ki da ka 'erlangthari jong me.

¹⁶ Tap ïa ki khmat jong ki da ka jinglehrain, A Trai bad pynlong ïa ki ban pdiang ïa ka bor jong me.

¹⁷ Ai ba kin shahjop bad sngewtriem junom; ai kin ïap ha ka jingjahburom.

¹⁸ Ai ba kin tip ba tang ma me hi me long U Trai u nongsynshar uba hakhlieh tam ha ka pyrthei baroh kawei.