SALM 81 - Khasi CL Bible (BSI)

Ka jingrwai na ka bynta Ka Jingkhawai Niam

¹ To risa jam ha U Blei u nongïada jong ngi, to rwai ka jingïaroh ha U Blei jong u Jakob.

² To sdang ka put ka tem, bad tem ïa ka kanjari, tem ïa ka sur sngewtynnat ha ki duitara bad ki nebel.

³ To put ïa ka turoi ha ka jinglehniam, haba dang lung bnai bad haba pyllun bnai.

⁴ Kane ka long ka aiñ ha Israel, ka hukum na U Blei jong u Jakob.

⁵ U la ai ïa ka ha ki paid Israel, mynba u tur ïaleh ïa ka ri Ijipt.

⁶ Nga ïohsngew ïa ka sur ba ngam ju tip kaba ong, “Nga la shim noh ïa ki jingkit na ki tyrpeng jong phi; nga shah ïa phi ban buh noh ïa la ki jingkit maw.

⁷ Haba phi la don ha ka jingjynjar, phi la khot kyrpad ïa nga, bad nga la pyllait im ïa phi. Na ka jakarieh jong nga ha ka 'erïong nga la jubab ïa phi. Nga la tynjuh ïa phi ha ki um ka Meribah.

⁸ To sngew, ko ki briew jong nga, ïa ka jingmaham jong nga; ko Israel, katno nga kwah ïa phi ba phin sngap ïa nga!

⁹ Phim dei da lei lei ban mane ïa uwei pat u blei,

¹⁰ Nga long U Trai U Blei jong phi, uba la wallam ïa phi na ka ri Ijipt. To ang ïa la ka shyntur, bad ngan pynkdang ïa phi.

¹¹ “Hynrei ki briew jong nga kim shym la sngap ïa nga; Ki Israel kim shym la kohnguh ïa nga.

¹² Kumta nga la shah ïa ki ban ïaid mutlop ha ki lynti jong ki bad ban leh kat kaba ki mon.

¹³ Katno nga kwah ba ki briew jong nga kin shahshkor ïa nga; A katno nga kwah ba kin kohnguh ïa nga!

¹⁴ Nga jop kloi ïa ki nongshun jong ki, bad ban jop ïa ki nongshun jong ki baroh.

¹⁵ Kito kiba isih ïa nga kin dem ngon ha ka jingsheptieng ha khmat jong nga, ka jingpynshitom ïa ki kan neh junom.

¹⁶ Hynrei ngan bsa ïa phi da u kew uba bha tam, bad ngan pynkdang ïa phi da ka ngap khlaw.”