SALM 80 - Khasi CL Bible (BSI)

Ka jingduwai ban pynbha pat ïa ka jaitbynriew

¹ To shahshkor ïa ngi, ko Nongap langbrot ka Israel; to sngew ïa ngi, ko nongïalam jong ka kynhun langbrot jong me. Me uba la shong halor ka khet halor jong ki kherub,

² to pynpaw ïa lade ha ki jait Ephraim, Benjamin, bad Manasseh. To pyn-i ha ngi ïa ka jingkhlaiñ jong me; A to wan bad pynim ïa ngi!

³ To wallam pat ïa ngi, A Blei! A to pyn-i ha ngi ïa ka jingisynei jong me, bad ïa ngi yn pynim!

⁴ Slem sa katno, A Trai U Blei Badonbor Baroh, ba men bitar ïa ki jingduwai jong ki briew jong me?

⁵ Me la ai ka jingsngewsih ha ngi ban bam, ki ummat ha ka khuri baheh ban dih.

⁶ Me la shah ïa ki jaitbynriew kiba don sawdong ban ïaleh ïa ka ri jong ngi; ki nongshun jong ngi ki rkhiebeiñ ïa ngi.

⁷ To wallam pat ïa ngi, A Blei Badonbor Baroh! A pyn-i ha ngi ïa ka jingisynei jong me, bad ïa ngi yn pynim!

⁸ Me la wallam ïa u dieng sohwaiñ na Ijipt; me la beh noh ïa kiwei pat ki jaitbynriew bad me la thung ïa u ha ka ri jong ki.

⁹ Me la pynkhuid ka jaka ïa u ba un san; ki thied jong u ki suh jylliew, bad ki pyiar sha kylleng jong ka ri.

¹⁰ U la tap ïa ki lumrit da ka jingkah jong u, ki tnat jong u ki kah syrngiew ïa ki dieng Kedar kiba radbah.

¹¹ U pyiar ïa ki tnat jong u sha ka Duriaw Mediterranian, bad shaduh ka wah Ïuphratis.

¹² Balei me pynkhyllem noh ïa ki jingker sawdong jong u? Mynta mano mano ba ïaid najan ki lah ban tuh ïa ki soh jong u;

¹³ Ki sniang khlaw ki ïuh ïa u, bad ki mradkhlaw ki bam ïa u.

¹⁴ To phai sha ngi, A Blei Badonbor Baroh! To khmih na bneng sha ngi; to wan bad pynim ïa ki briew jong me!

¹⁵ To wan bad pynim ïa une u dieng sohwaiñ uba me la thung, une u dieng sohwaiñ ba dang lung uba me la pynkhlaiñ ïa u katba u nang san!

¹⁶ Ki nongshun jong ngi ki la thang ïa u da ka ding, bad ki la khet noh ïa u; to khmih ïa ki ha ka jingbitar bad pynjot thiaw ïa ki!

¹⁷ To sumar bad to ïada ïa ki briew kiba me la jied, ka jaitbynriew kaba me la pynlong kaba khlaiñ bha.

¹⁸ Ngin ym phai shuh da lei lei na me; to pynim ïa ngi, bad ngin ïaroh ïa me.

¹⁹ To wallam pat ïa ngi, A Trai U Blei Badonbor Baroh. Pyni ha ngi ïa ka jingisynei jong me, bad ïa ngi yn pynim.