SALM 8 - Khasi CL Bible (BSI)

Ka burom U Blei bad ka jingkyntiew burom ïa u Briew

¹ A Trai, U Trai jong ngi, ïa ka jingkhraw jong me la ïohi ha ka pyrthei baroh! Ka jingïaroh jong me ka kot haduh ki bneng;

² la rwai da ki khynnah bad ki khunlung. Me shongshngain bad skhem na ki nongshun jong me baroh; me pynsangeh ïano ïano ba-ïaleh pyrshah ïa me.

³ Haba nga khmih ïa ka sahit bneng kaba me la thaw, ïa u bnai bad ki khlur, kiba me la buh ha ki jaka jong ki —

⁴ u briew u long uei, ba me pyrkhat ïa u; u long tang u briew, ba me da sumar ïa u?

⁵ Pynban me la pynlong ïa u, uba kham hapoh tang ïa me hi; me la pynphong pansngiat ïa u da ka burom bad jingpyndonburom.

⁶ Me la thung ïa u, u nongsynshar halor kiei kiei baroh ba me la thaw; me la buh ïa u halor ki jingthaw baroh:

⁷ ki langbrot bad ki masi, bad ki mradkhlaw ruh;

⁸ ki sim bad ki dohkha bad ki jingthaw ha ki duriaw.

⁹ A Trai, U Trai jong ngi, ïa ka jingkhraw jong me la ïohi ha ka pyrthei baroh!