SALM 78 - Khasi CL Bible (BSI)

U Blei bad ki briew jong u

¹ To shahshkor, ko ki briew jong nga, ïa ka jinghikai jong nga; bad to pynleit jingmut ïa kaei kaba nga ong.

² Nga sa pyndonkam ïa ki jingkren bastad bad batai ïa ki jingmaïan na mynbarim,

³ ïa kiei kiei kiba ngi la ïohsngew bad tip, kiei kiei kiba ki kpa jong ngi ki la ïathuh ïa ngi.

⁴ Ngin ym buhrieh ïa ki na ki khun jong ngi; ngin ïathuh ïa ka pateng kaba bud shaphang ka bor ka jong U Trai, bad ïa ki kam bakhraw jong u bad ïa ki kamphylla kiba u la leh.

⁵ U la ai ïa ki aiñ ha ki paid Israel, bad ïa ki hukum ha ki khun ki ksiew jong u Jakob. U la bthah ïa ki kpa tymmen jong ngi ban hikai ïa ki aiñ jong u ha ki khun jong ki,

⁶ ba kumta ka pateng kaba bud ka lah ban nang ïa ki bad ma ki pat kin ïathuh ïa ki khun jong ki.

⁷ Ha kane ka rukom ma ki ruh kin buh ïa la ka jingshaniah ha U Blei bad kin ym klet ïa kaei kaba u la leh, hynrei kin ïai kohnguh ïa ki hukum jong u.

⁸ Kin ym long kum ki kpa tymmen jong ki; ki briew kiba ïeng ïaleh pyrshah bad ki bymkohnguh, kiba ka jingshaniah jong ki ha U Blei kam ju long kaba skhem, bad ki bym shym la ïaineh ha u.

⁹ Ki Ephraim, kiba la kieng atiar da ki ryntieh bad ki khnam, ki phet krad ha ka sngi ïaleh thma.

¹⁰ Kim shym bat ïa ka jutang jong ki bad U Blei; ki kyntait ban kohnguh ïa ka aiñ jong u.

¹¹ Ki la klet ïa kaei kaba u la leh, ki kambah kiba ki lah ïohi ïa u ba u leh.

¹² Katba ki kpa tymmen ki ap khmih, U Blei u la leh ïa ki kambah ha ki pyntha jong ka Soan ha ka ri Ijipt.

¹³ U la kad arliang ïa ka duriaw bad u la ïalam ïa ki lyngba jong ka; u la pynlong ïa ki um ban ïeng kum ki kynroh.

¹⁴ Mynsngi u la ïalam ïa ki da u lyoh, bad baroh shi miet da ka jingshai jong ka ding.

¹⁵ U la pied ïa ki mawsiang ha ri shyiap bad u la ai ha ki, ka um na ki jingjylliew.

¹⁶ U la pynlong ïa ka wahduid ban mih shabar na u mawsiang bad u pynlong ïa ka um ban tuid kum ka wah.

¹⁷ Pynban ki ïai bteng ban leh pop pyrshah ïa U Blei, bad ha ka ri shyiap ki la ïeng ïaleh pyrshah Uba Ha Khlieh Tam Eh.

¹⁸ Da kaba leh khnang ki la tynjuh ïa U Blei da kaba dawa ïa ka jingbam kaba ki kwah.

¹⁹ Ki la kren pyrshah ïa U Blei bad ki ong, “Hato U Blei u lah ban ai jingbam ha ka ri shyiap?

²⁰ Ka long kaba shisha ba u la tied ïa u mawsiang, bad ka um ka la tuid shabar ha ka jingkynshait; hynrei hato u lah mo ban bsa ruh da u kpu bad ai doh ha ki briew jong u?”

²¹ Bad kumta U Trai u la bitar haba u la ïohsngew ïa ki; u la tur ïaleh ïa ki briew jong u da ka ding, bad ka jingbitar jong u pyrshah ïa ki ka nang khluit,

²² namar kim don jingshaniah ha u bad ba kim shym ngeit ba un pynim ïa ki.

²³ Hynrei u la kren ïa ka sahit bneng shajrong bad u la hukum ïa ki jingkhang jong ka ban plie;

²⁴ u la ai kew ïa ki na bneng, da kaba phah sha tbian ïa ka manna na ka bynta jong ki ban bam.

²⁵ Kumta ki la bam ïa ka jingbam jong ki angel, bad U Blei u la ai ha ki baroh kaba ki la kwah.

²⁶ U la pynlong ruh ïa ka lyer mihngi ban beh, bad da ka bor jong u, u la pynkhih ïa ka lyer shathie;

²⁷ bad u la phah sha tbian ïa ki sim ha ki briew jong u, kiba bun kat ki symboh shyiap ka rud duriaw;

²⁸ ki la hap hapdeng jong ka jaka shong dara, baroh sawdong jong ki ïingjaiñ.

²⁹ Kumta ki briew ki la bam bad ki la kdang; U Blei u la ai ha ki ïa kaei kaba ki la kwah.

³⁰ Hynrei kim pat shym la pynhun ïa ka jingkwah jong ki bad ki dang ïai bam,

³¹ haba U Blei u la bitar ïa ki, bad u la pynïap ïa ki rangbah bakhlaiñ tam jong ki, ïa ki rangkynsai jong ki Israel.

³² Nalor kane baroh, ki briew ki dang ïai leh pop; nalor ki kambah jong u, kim shym la shaniah ïa u.

³³ Kumta u la pynkut ïa ki sngi jong ki kum ka jingring pynhiar mynsiem bad ïa ka jingim jong ki da ka jingpynjot kaba kynsan.

³⁴ Ha man ba u pynïap ïa ki katto katne na ki, kiba sah ki ju phai sha u; ki ju kylla-kaba-mut bad duwai naduh ka dohnud sha u.

³⁵ Ki la kynmaw ba U Blei u long u nongïada jong ki, ba U Badonbor Baroh u la wan ïarap ïa ki.

³⁶ Hynrei ki kyntien jong ki, ki long baroh kiba lamler; ym don kano kano kaba ki kren kaba long kaba sngur.

³⁷ Kim shym la shaniah ïa u; kim shym la ïaineh ha ka jutang jong ki bad u.

³⁸ Hynrei U Blei u la sngewsynei ïa ki briew jong u. U la map ïa ki pop jong ki bad um shym pynjot ïa ki. Bunsien u set noh ïa ka jingbitar jong u bad u tyngkai ïa ka jingbitar shla jong u.

³⁹ U la kynmaw ba ki shu long tang ki briew, kum ka lyer kaba beh bad ka jah noh.

⁴⁰ Katno sien ki la ïeng ïaleh pyrshah ïa u ha ka ri shyiap; katno sien ruh ki la pynsngewsih ïa u!

⁴¹ Man la ka por ki tynjuh ïa U Blei, bad ki la pynmong U Blei Uba Khuid jong ki Israel.

⁴² Ki la klet ïa ka bor bakhraw jong u bad ïa ka sngi ha kaba u la pynim ïa ki na ki nongshun jong ki

⁴³ bad u la leh ïa ki kam badonbor bad ki kambah ha ki pyntha jong ka Soan ha ka ri Ijipt.

⁴⁴ U la pynkylla snam ïa ki wah, bad ki nong Ijipt kim don um shuh ban dih.

⁴⁵ U la phah ïa ki skain hapdeng jong ki, kiba pynkordit ïa ki, bad ïa ki jakoid kiba pynjot ïa ka ri jong ki.

⁴⁶ U la phah ïa ki puit ban bam ïa ki jingthung jong ki bad ban pynjot ïa ki lyngkha jong ki.

⁴⁷ U la pynïap ïa ki dieng sohwaiñ jong ki da u phria, bad ïa ki diengsoh Dumbur jong ki da u thah.

⁴⁸ U la pynïap ïa ki masi jong ki da u phria, bad ïa ki kynhun langbrot jong ki da ka leilieh.

⁴⁹ U la pynlong ïa ki ban jynjar sat da kaba theh ha ki ïa ka jingbitar bad ka jingbitar shla jong u, kiba wan kum ki nonglamktien jong ka jingïap.

⁵⁰ Um shym la tyngkan ïa ka jingbitar jong u lane pynsah ïa ka jingim jong ki, hynrei u la pynïap ïa ki da ka khlam.

⁵¹ U la pynïap ïa ki khun shynrang kiba la kha nyngkong na ki longïing jong ka Ijipt.

⁵² Nangta u la ïalam shabar ïa ki briew jong u kum u nongap langbrot bad u la ïalam lynti ïa ki lyngba ka ri shyiap.

⁵³ U la ïalam ïa ki ha ka jingshngain, bad kim shym la sheptieng; hynrei ka duriaw ka la wan tyllep halor ki nongshun jong ki.

⁵⁴ U la wallam ïa ki sha kane ka ri bakhuid jong u, sha ki lumbah kiba ma u hi u la jop.

⁵⁵ U la beh noh ïa ki nongshong shnong katba ki briew jong u ki dang jam shaphrang; u la pynbynta ïa ka ri jong ki hapdeng ki jait jong ka Israel bad u la ai ïa ki ïing jong ki ha ki briew jong u.

⁵⁶ Hynrei ki la ïeng ïaleh pyrshah ïa U Blei Badonbor Baroh bad ki la tynjuh ïa u. Kim shym la kohnguh ïa ki hukum jong u,

⁵⁷ hynrei ki la ïeng ïaleh pyrshah bad kim kohnguh kum ki kpa tymmen jong ki, ki bym lah ban shaniah kum u khnam uba la kdor.

⁵⁸ Ki la pynbitar ïa u da ki jaka mane blei jong ki bymngeit, bad da ki bleithaw jong ki, ki pynlong ïa u ban bitar shla.

⁵⁹ U Blei u la bitar haba u la ïohi ïa ka, kumta u la kyntait lut ïa ki briew jong u.

⁶⁰ U la iehnoh ïa ka ïingjaiñ jong u ha Shiloh, ka ïing ha kaba u la shong hapdeng jong ngi.

⁶¹ U la shah ïa ki nongshun jong ngi ban kurup ïa ka Synduk ka Jutang, ka dak jong ka bor bad ka burom jong u.

⁶² U la bitar ïa ki briew jong u hi bad u ai ïa ki ban shah pynïap ha ki nongshun jong ki.

⁶³ Ki samla shynrang ki la shah pynïap ha ka thma, bad ïa ki samla kynthei jong ki kim don uno uno ban shongkurim.

⁶⁴ Ki lyngdoh ki ïap da ka jinglehbor, bad ïa ki riewkynthei jong ki ym shym la shah ban ïambriew.

⁶⁵ Ha kaba khatduh U Trai u la khie kumba na ka jingïohthiah; u la long kum u briew uba khlaiñ uba shongshit ha ka waiñ.

⁶⁶ U la beh krad ïa ki nongshun jong u ha ka jingshahjop kaba neh bad kaba sngewlehrain.

⁶⁷ Hynrei u la kyntait ïa ki khun ki ksiew jong u Joseph; um shym la jied ïa ka jait Ephraim.

⁶⁸ Pynban u la jied ïa ka jait Judah bad ïa u lum Seïon, uba u ieit eh.

⁶⁹ Hangta u la tei ïa ka Templ jong u kum ka ïing jong u ha bneng; u la pynlong ïa ka, kaba skhem kum ka khyndew hi, kaba neh ha ki por baroh.

⁷⁰ U la jied ïa u Dabid, u shakri jong u; u la shim ïa u na ki jaka pynbamphlang,

⁷¹ na kaba sharai ïa ki kynhun langbrot jong u, bad u la pynlong ïa u, u syiem ka Israel, u nongap langbrot jong ki briew jong U Blei.

⁷² U Dabid u la sumar ïa ki da ka jingaiti bym khwan myntoi bad ïalam ïa ki da ka jingtbit.