SALM 76 - Khasi CL Bible (BSI)

U Blei u nongjop

¹ Ïa U Blei la ithuh ha Judah; ïa ka kyrteng jong u la pyndonburom ha Israel.

² U don ka ïing jong u ha Jerusalem; u shong ha u lum Seïon.

³ Hangta u kdiah ïa ki khnam jong ki nongshun, ïa ki stieh bad ki waitlam, ho-oid, ïa ki tiar pynmynsaw jong ki baroh.

⁴ A katno me long uba donburom, A Blei! Katno me long uba iphieng, haba me wan phai na ki lumbah ha kiba me la jop ïa ki nongshun jong me.

⁵ Ïa ki shipai bashlur jong ki la sloit lut ïa kaba ki don bad mynta ki thiah ka jingïohthiah jong ka jingïap; ka jingkhlaiñ bad ka jingtbit jong ki baroh ka long ka bymmyntoi.

⁶ Haba me byrngem ïa ki, A Blei jong u Jakob, ki kulai bad ki nongshong jong ki, ki kyllon ïap.

⁷ Hynrei ïa me, A Trai, baroh ki sheptieng. Ym don mano mano ba lah ban ïeng ha ka jingdon ryngkat jong me haba me bitar.

⁸ Me la pynlong ïa ka jingbishar jong me ban tip na bneng; ka pyrthei ka sheptieng bad ka sngap jar,

⁹ haba me la ïeng ban pynbna ïa ka jingbishar, ban pyllait im ïa baroh kiba la shah banbeiñ ha ka pyrthei.

¹⁰ Ka jingbitar briew ka pynmih tang ki jingïaroh babun ïa me; kito kiba lait im na ki thma kin sumar ïa ki Jingkhawai Niam jong me.

¹¹ To ai ha U Trai U Blei jong phi ïa kaei kaba phi la kular ha u; to wallam ki jingai sngewbha sha u, phi baroh ki jaitbynriew kiba marjan. U Blei u pynlong ïa ki briew ban sheptieng ïa u;

¹² u pyndem ïa ki khun syiem shynrang kiba sarong, bad u pynshyrkhei ïa ki syiem kiba khraw.