SALM 74 - Khasi CL Bible (BSI)

Ka jingduwai na ka bynta ka jingpyllait ïa ka jaitbynriew

¹ Balei ba me la iehnoh ïa ngi kumne, A Blei? Hato men bitar ïa ki briew jong me hi junom?

² To kynmaw ïa ki briew jong me, kiba me la jied na ka bynta ïa lade la slem bah, kiba me la wallam na ka jinglongmraw ban long ka jait ka jong me hi. To kynmaw ïa u lum Seïon, ha kaba shisien me la shong.

³ To ïaid halor kine ki jingjot baroh; ki nongshun jong ngi ki la pynjot thiaw ïa kaei kaei baroh hapoh jong ka Templ.

⁴ Ki nongshun jong me ki la pyrta ha ka jingjop hapoh ka Templ jong me; ki la sieh ïa ki lama jong ki hangta kum ki dak jong ka jingjop.

⁵ Ki la i kum ki nongot dieng kiba khet ïa ki dieng da ki sdie jong ki.

⁶ Ki tied pynpra ïa baroh ki syrtap dieng da ki sdie bad ki tyrnem bah jong ki.

⁷ Ki la pynjot ïa ka Templ jong me bad ki wiang ding ïa ka; ki la pyntngit ïa ka jaka ha kaba la mane ïa me.

⁸ Ki la kwah ban pynlwet thiaw ïa ngi; ki la thang ïa kawei pa kawei ka jaka bakhuid ha ka ri.

⁹ Baroh ki dak bakyntang jong ngi kim don shuh; ym don shuh uno uno u nongïathuhlypa uba dang sah, bad ym don shuh mano mano batip sa haduh katno kane kan neh.

¹⁰ Sa katno, A Blei, ba ki nongshun jong me kin rkhiebeiñ ïa me? Hato kin ibeiñ ïa ka kyrteng jong me junom?

¹¹ Balei ba me la kyntait ban ïarap ïa ngi? Balei ba me buh ïa ki kti jong me shadien jong me?

¹² Hynrei me la long u syiem jong ngi naduh kaba sdang, A Blei; me la pyllait im ïa ngi bunsien.

¹³ Da ka jingkhlaiñbor jong me, me la phiah arliang ïa ka duriaw bad me la tied pynpait ïa ki khlieh jong ki mrad kynsha ka duriaw;

¹⁴ me la pynlwet ïa ki khlieh jong u Lebiathan, u mrad kynsha bad me la bsa da ka met jong u ïa ki mrad ha ka ri shyiap.

¹⁵ Me la pynlong ïa ki wahduid bad ïa ki umpohliew ban tuid; me la pynrngad ïa ki wahbah.

¹⁶ Me la pynlong ïa ka sngi bad ka miet; me la buh ïa ka sngi bad ïa u bnai ha la ki jaka;

¹⁷ me la buh ïa ki pud jong ka khyndew; me la pynlong ïa ka lyiur bad ka tlang.

¹⁸ Hynrei to kynmaw, A Trai, ba ki nongshun jong me ki rkhiebeiñ ïa me, ba ki long ki bym don blei bad ki ibeiñ ïa me.

¹⁹ Wat iehnoh ïa ki briew bymdonbor jong me ha ki nongshun barunar jong ki; wat klet noh ïa ki briew jong me kiba la shah pynshitom beiñ!

²⁰ To kynmaw ïa ka jutang kaba me la pynlong bad ngi. Don ka jingleh jubor ha kawei pa kawei ka dong kaba dum jong ka ri.

²¹ Wat ai ba kiba la shah banbeiñ kin shah pynlehrain; ai ba kiba duk bad kiba kyrduh kin ïaroh ïa me.

²² To ïeng, A Blei, bad kyrshan ïa ka jingthmu jong me! To kynmaw ba ki briew bym don blei ki rkhie ïa me baroh shi sngi.

²³ Wat klet ïa ki jingkyang ba bitar jong ki nongshun jong me, ïa ka jingïai-pynsawa da ki nongshun jong me.