SALM 73 - Khasi CL Bible (BSI)

Ka Kitab Balai ( Salm. 73—89 ) Ka jingbishar hok U Blei

¹ U Blei u long da shisha uba bha ïa ki Israel, ïa kito kiba don ki dohnud basngur.

² Hynrei nga la jan duh ka jingsngewskhem; ka jingngeit jong nga ka la jan jah noh

³ namar nga la bishni ïa kiba sarong haba nga ïohi ba kiei kiei ki bit ki biang ïa ki bymman.

⁴ Kim ju ïoh jingshitom; ki long kiba khlaiñ bad kiba khiah krat.

⁵ Kim ju shahshitom kum kiwei pat ki briew; kim ju ïoh ïa ki jingjynjar kiba kiwei ki don.

⁶ Bad kumta ki deng ïa ka jingsarong kum u kpieng bad ïa ka jingleh jubor kum ka jaiñkup;

⁷ ki dohnud jong ki, ki theh noh ïa kaba sniew, bad ki jingmut jong ki, ki bunkam da ki jingthmu bymman.

⁸ Ki rkhiebeiñ ïa kiwei pat ki briew bad ki kren ïa kiei kiei kiba sniew; ki long kiba sarong bad ki pynlong ki jingthmu ban banbeiñ ïa kiwei.

⁹ Ki kren sniew ïa U Blei ha ki bneng, bad ki ai ki hukum bameng ïa uwei pa uwei ha ka pyrthei,

¹⁰ ba kumta wat ki briew jong U Blei ki phai sha ki bad ki ngeit da kaba kmen eh ïa kaei kaba ki ong.

¹¹ Ki ong, “U Blei um tip; Uba Hakhlieh Tam Eh un ym lap.”

¹² Kata ka long kaei kaba ki bymman ki long. Ki don kyrhai bad ki nang ïai ïoh shuh shuh.

¹³ Hato ka dei ïa ka bym don ei ei, ba nga la sumar khuid ïa lade bad ba ngam shym la leh pop?

¹⁴ A Blei, me la pynlong ïa nga ban shahshitom baroh shi sngi; man la ka step me la pynshitom ïa nga.

¹⁵ Lada nga la ong ïa kiba kum kine kiei kiei, ngan ym da la leh kum uwei na ki briew jong me.

¹⁶ Nga la pyrshang ban pyrkhat lut shaphang kane ka jingeh, hynrei ka long kaba da eh than ïa nga,

¹⁷ tad ynda nga la leit sha ka Templ jong me. Te nga la sngewthuh kaei ka ban jia ïa ki bymman.

¹⁸ Men buh ïa ki ha ki jaka kiba btuit bad pynlong ïa ki ban kyllon sha ka jingpynjot!

¹⁹ La pynjot ïa ki ha ka shikhyllipmat, ki la leit hiar sha ka jingkut kaba shyrkhei.

²⁰ Ki long kum ka jingphohsniew kaba jah noh ha ka por mynstep; haba me pynkhie ïa lade, A Trai, ki jah noh.

²¹ Haba ki jingpyrkhat jong nga ki kthang bad ki jingsngew jong nga ki sngewmong,

²² nga la long uba mutlop kum ka mrad; ngam shym shemphang ïa me.

²³ Pynban nga ïai don ha syndah jong me, bad me bat ïa nga da ka kti.

²⁴ Me kdew lynti ïa nga da ka jingbthah jong me bad ha kaba kut men pdiang ïa nga da kaba donburom.

²⁵ Nga don ïano pat ha bneng lait na me? Namar ba nga don ïa me, sa kaei pat nga dang kwah ha ka pyrthei?

²⁶ Ka jingmut jong nga bad ka met jong nga ka lah ban sdang tlot, hynrei U Blei u long ka jingkhlaiñ jong nga; u long baroh kaba nga ju donkam.

²⁷ Kito kiba iehnoh ïa me kin ïap da shisha; men pynjot thiaw ïa kito ki bymïaineh ha me.

²⁸ Hynrei ïa nga, katno kaba phylla ban don hajan U Blei, ban shem ka jingïada bad U Trai U Nongsynshar bad ban pynbna ïa baroh kaba u la leh!