SALM 72 - Khasi CL Bible (BSI)

Ka jingduwai na ka bynta u syiem

¹ To hikai ïa u syiem ban bishar da ka hok jong me, A Blei; ïabynta bad u ïa ka jingbishar hok ka jong me,

² ba kumta un synshar halor ki briew jong me da ka jingbishar hok bad synshar ïa kiba la shah banbeiñ da ka hok.

³ Ai ba ka ri kan lehkmen ha ka jingroi kyrhai; ai kan mad ïa ka hok.

⁴ Ai ba u syiem un bishar hok ïa kiba duk; ai un ïarap ïa kiba kyrduh, bad un jop ïa ki nongbanbeiñ jong ki.

⁵ Ai ba ki briew jong me kin mane ïa me katba ka sngi ka dang tyngshaiñ, katba u bnai u dang ai jingshai, ha ki pateng ban wan.

⁶ Ai ba u syiem un long kum u slap ha ki lyngkha, kum u 'lap praw uba hap halor ka khyndew.

⁷ Ai ba ka hok kan roi ha ka rta jong u, bad ai ba ka jingroi kyrhai kan neh katba u bnai u ai jingshai.

⁸ Ka hima jong u kan kot na ka duriaw sha ka duriaw, na ka Ïuphratis sha kiba kut jong ka pyrthei.

⁹ Ki briew jong ka ri shyiap kin nguh ngon ha khmat jong u; ki nongshun jong u kin rynsied ïa lade ha madan.

¹⁰ Ki syiem jong ka Spain bad jong ki dewlynnong kin tyrwa ha u ki jingai sngewbha; ki syiem jong ka Sheba bad Seba kin wanrah ha u ki jingainguh.

¹¹ Ki syiem baroh kin dem ngon ha khmat jong u, ki jaitbynriew baroh kin shakri ïa u.

¹² U pyllait ïa kiba duk kiba khot kyrpad ïa u, bad ïa kito kiba kyrduh bad kiba la shah iehnoh beiñ.

¹³ U don jingisynei ïa kiba tlot bad kiba duk; u pynim ïa ka jingim jong kito kiba kyrduh.

¹⁴ U pyllait im ïa ki na ka jingshah banbeiñ bad jingshah leh jubor; ki jingim jong ki, ki long kiba kordor ha u.

¹⁵ To u syiem un im slem! Ai ba yn ai ha u ïa ka ksiar na Arabia; ai ba yn pynlong jingduwai na ka bynta jong u ha ki por baroh; ai ba ki jingkyrkhu jong U Blei kin long halor jong u borabor!

¹⁶ Ai ba yn don kyrhai u riewhadem ha ka ri; ai ba ïa ki lumrit yn tap da ki jingthung, kiba seisoh kum kito ki jong ka Lebanon. Ai ba ki nongbah kin dap da ki briew, kum ki pyntha kiba shlei da u phlang.

¹⁷ Ai ban ym klet da lei lei ïa ka kyrteng jong u syiem; ai ba ka nam jong u kan neh kumba neh ka sngi. Ai ba ki jaitbynriew baroh kin kyrpad ïa U Blei ban kyrkhu ïa ki kumba u la kyrkhu ïa u syiem.

¹⁸ To ïaroh ïa U Trai, U Blei ki Israel! Tang ma u hi uba leh ïa kine kiei kiei kiba phylla.

¹⁹ To ïaroh ïa ka kyrteng badonburom jong u junom! Ai ba ka burom jong u kan pyndap ïa ka pyrthei baroh kawei. Amen! Amen!

²⁰ Kane ka dei kaba kut jong ki jingduwai u Dabid u khun jong u Jesse.