SALM 71 - Khasi CL Bible (BSI)

Ka jingduwai u riewtymmen

¹ A Trai, nga la wan ha me ban ïoh jingïada; wat shah da lei lei ba ngan shahjop!

² Namar me long uba hok, to ïarap ïa nga bad to pyllait ïa nga. To shahshkor ïa nga, bad to pynim ïa nga!

³ To long ka jakarieh kaba skhem jong nga, ka kut bakhlaiñ ban ïada ïa nga; me long ka jakarieh bad ka jingkyrshan jong nga.

⁴ A Blei jong nga, to pyllait im ïa nga na ki bymman, na ka bor jong kito kiba runar bad kiba sniew.

⁵ A Trai U Nongsynshar, nga buh ïa ka jingkyrmen jong nga ha me; nga la shaniah ha me naduh ba nga dang samla.

⁶ Nga la shaniah ha me shi lynter ka jingim jong nga; me la ïada ïa nga naduh ka sngi ba la kha ïa nga. Ngan ïai ïaroh ïa me.

⁷ Ka jingim jong nga ka la long ka nuksa ïa kiba bun, namar me la long ka jingïada bakhlaiñ jong nga.

⁸ Baroh shi sngi nga ïaroh ïa me bad pynbna ïa ka burom jong me.

⁹ Wat kyntait ïa nga mynta ba nga la tymmen; wat iehnoh ïa nga mynta ba nga la tlot.

¹⁰ Ki nongshun jong nga ki kwah ban pynïap ïa nga; ki ïakren bad sylla pyrshah ïa nga.

¹¹ Ki ong, “U Blei u la iehnoh ïa u; ïa ngin ïabeh bad kem ïa u; ym don mano mano ban pyllait im ïa u.”

¹² Wat shong jngai eh, A Blei; A Blei jong nga, to pynkloi ban ïarap ïa nga!

¹³ Ai ba kito kiba tur ïaleh ïa nga kin shahjop bad shah pynjot. Ai ba kito kiba pyrshang ban pynmynsaw ïa nga kin shah pynlehrain bad shah pynjahburom.

¹⁴ Ngan ïai buh ïa ka jingkyrmen jong nga ha me, ngan ïaroh ïa me shuh shuh.

¹⁵ Ngan ïathuh shaphang ka jingbha jong me; baroh shi sngi ngan kren shaphang ka jingpynim jong me, wat la ka long palat ïa kaba nga lah ban sngewthuh.

¹⁶ Ngan ïaroh ïa ka bor jong me, A Trai U Nongsynshar; ngan pynbna ïa ka jingbha jong me, tang ka jong me hi.

¹⁷ Me la hikai ïa nga naduh ba nga dang samla, bad nga dang ïai ïathuh ïa ki kam kiba phylla jong me.

¹⁸ Mynta ba nga la tymmen ruh bad ba u shñiuh jong nga u la lieh, wat iehnoh ïa nga, A Blei! to long bad nga katba nga pynbna ïa ka bor bad ka jingkhlaiñbor jong me ha ki pateng baroh ki ban sa wan.

¹⁹ Ka hok jong me, A Blei, ka kot ïa ki sahit bneng. Me la leh ïa kiei kiei kiba khraw, ym don mano mano uba kum ma me.

²⁰ Me la phah ki jingjynjar bad ki jingshitom halor jong nga, hynrei men pynïoh pat ka jingkhlaiñ ha nga; men sumar ïa nga na ka jingtep.

²¹ Men pynlong ïa nga uba kham khraw ban ïa kaba ju long; bad men pyntngen biang ïa nga.

²² Da shisha ngan ïaroh ïa me da ka duitara; ngan ïaroh ïa ka jingïaineh jong me, A Blei jong nga. Ha ka duitara jong nga ngan tem ïa ki jingrwai sha me, Uta Uba Khuid ki Israel.

²³ Ngan pyrta da kaba kmen katba nga dang tem na ka bynta jong me; da ka longrynïeng jong nga baroh kawei ngan rwai namar ba me la pynim ïa nga.

²⁴ Ngan kren shaphang ka hok jong me baroh shi sngi, namar kito kiba pyrshang ban pynmynsaw ïa nga ki la shahjop bad shah pynlehrain.