SALM 7 - Khasi CL Bible (BSI)

Ka jingduwai ban ïoh ïa ka jingbishar hok

¹ A Trai, U Blei jong nga, nga wan sha me ban ïoh jingïada; to pyllait bad pynim ïa nga na baroh kiba beh kthong ïa nga,

² ïoh ba kum u sing kin rong noh ïa nga sha kaba ym don ba lah ban pyllait im ïa nga, bad hangta kin patar lyngkhot lyngkhai ïa nga.

^3-4 A Trai, U Blei jong nga, lada nga la leh bakla ïano ïano, lada nga la shetkylla ïa u paralok, lane nga la leh jubor khlem daw ïa u nongshun jong nga — lada nga la leh ïa kano kano na kine kiei kiei —

⁵ te ai ba ki nongshun jong nga kin beh kthong ïa nga bad kem ïa nga, ai ba kin ot ïa nga bad pynïap ïa nga bad ieh ïa nga uba khlem don jingim ha khyndew!

⁶ To ïeng ha ka jingbitar jong me, A Trai! To ïeng pyrshah ïa ka jingbitar ki nongshun jong nga; to pynkhie joit ïa lade bad ïarap ïa nga! Ka jingbishar hok ka dei kaba me dawa,

⁷ kumta wallam lang ïa ki briew baroh sawdong jong me, bad to synshar halor jong ki najrong.

⁸ Me long u nongbishar jong ka longbriew manbriew baroh kawei; to bishar da kaba lehsbun ïa nga, A Trai; me tip ba nga long uba lui lui.

⁹ Me long U Blei uba hok, bad me bishar ïa ki jingpyrkhat bad ïa ki jingkwah jong ngi. Pynsangeh ïa ka jingbymman jong ki nongkamsniew bad ainong ïa kito kiba bha.

¹⁰ U Blei u long u nongïada jong nga; u pynim ïa kito kiba kohnguh ïa u.

¹¹ U Blei u long u nongbishar uba hok, bad u ïai pynrem ïa ki bymman.

¹² Lada kim kylla ïa ki lynti jong ki, U Blei un pynnep ïa la ka waitlam. U pynkhun ïa la ka ryntieh bad u pynkhreh ïa ka;

¹³ u shim ïa la ki atiar pynmynsaw bad u thew ïa ki khnam bameh ding jong u.

¹⁴ Ha khmih haduh katno ki briew ki pyrkhat ïa ka jingbymman; ki thmu ban pynkulmar bad leh shukor.

¹⁵ Hynrei ha ki jingriam ba ki pynap ïa kiwei, ma ki hi ki ngat.

¹⁶ Kumta ïa ki la pynshitom da ki kam sniew jong ki hi bad ki mynsaw na ka jingleh jubor jong ki hi.

¹⁷ Nga ainguh ïa U Trai namar ka jingbishar hok jong u, nga rwai ki jingïaroh ïa U Trai, Uba Hakhlieh Tam Eh.