SALM 68 - Khasi CL Bible (BSI)

Ka jingrwai jingjop jong ka jaitbynriew

¹ U Blei u ïeng joit bad u pynsakma ïa ki nongshun jong u. Kito kiba shun ïa u kin phet krad ha ka jingshahjop.

² Kumba ïa ka tdem la beh noh, kumta ruh beh noh ïa ki; kumba ka bthing ka um ha khmat ka ding, kumta ruh ai ba ki bymman kin ïap ha ka jingdon ryngkat jong U Blei.

³ Hynrei kiba hok ki kmen bad ki risa ha ka jingdon ryngkat jong u; ki kmen bad ki risa da ka jingkmen.

⁴ To rwai ha U Blei, rwai ki jingïaroh ïa ka kyrteng jong u; pynkhreh ka lynti ïa uta uba shong halor jong ki lyoh. Ka kyrteng jong u ka long U Trai — A to lehkmen ha ka jingdon ryngkat jong u!

⁵ U Blei, uba shong ha ka Templ bakyntang jong u, u sumar ïa ki khunswet bad u ïada ïa ki riewkynthei.

⁶ U ai ka ïing ha kiba marwei ban shong ban sah bad u ïalam shabar ïa ki koidi sha ka jinglaitluid bakmen, hynrei kiba ïeng ïaleh pyrshah kin hap ban sah ha ka ri khlaw.

⁷ A Blei, haba me ïalam ïa ki briew jong me, haba me ïaid lyngba ïa ka ri shyiap,

⁸ ka khyndew ka khynñiuh, bad ka suiñbneng ka pynhap slap, namar ka jingwan jong U Blei u Lum Sinai, ka jingwan jong U Blei ki Israel.

⁹ Me la pynhap kyrhai u slap bad me pynbha pat ïa ka ri kaba tyrkhong;

¹⁰ ki briew jong me ki pynlong ïa la ki jaka shong hangta; ha ka jingbha jong me, me la pyndap ïa kiba duk.

¹¹ U Trai u ai ïa ka hukum, bad bun ki kynthei ki rah ïa ka khubor:

¹² “Ki syiem bad ki shipai jong ki, ki ïaphet krad!” Ki kynthei ha ïing ki ïasam ïa kaei kaba la ïoh kurup:

¹³ ki dur paro kiba la sop da ka rupa, kiba ki thapniang jong ki, ki thaba da ka ksiar nylla. (Balei ba katto katne na phi, phi sah hapdeng ki sem langbrot ha ka sngi jong ka thma?)

¹⁴ Haba U Blei Badonbor Baroh u pynsakma ïa ki syiem halor u lum Salmon, u pynlong ïa ka ïor ban hap hangta.

¹⁵ A katno u lumbah bakhraw long u lum Bashan, u lum jong ki syntai lum babun!

¹⁶ Balei na ki syntai lum bakhraw jong me, me khmih da ka jingibeiñ ïa u lumbah ha uba U Blei u la jied ban shong? U Trai un shong hangta junom!

¹⁷ Lem bad ki phew hajar ki kali ïapom bakhlaiñ jong u, U Trai u wan na Sinai sha ka jaka bakhuid.

¹⁸ U kiew sha kiba kynjang, u da ïalam bad u shibun ki koidi; u pdiang ki jingai sngewbha na ki briew kiba ïeng ïaleh pyrshah. U Trai U Blei un ïoh shong hangta.

¹⁹ To ïaroh ïa U Trai, uba bah man ka sngi ïa ki jingkit jong ngi; u dei U Blei uba pynim ïa ngi.

²⁰ U Blei jong ngi u long U Blei uba pynim; u long U Trai, u Trai jong ngi, uba pyllait im ïa ngi na ka jingïap.

²¹ U Blei da shisha un pynpait ïa ki khlieh jong ki nongshun jong u, jong kito kiba ïai bteng ha ki jingim pop jong ki.

²² U Trai u la ong, “Ngan wallam biang ïa ki nongshun jong phi na Bashan; ngan wallam biang na ki jingjylliew jong ka duriaw-bah,

²³ khnang ba phi lah ban ïaid ha ka snam jong ki; bad ki ksew jong phi ki lah ban jliah kat kaba ki kwah.”

²⁴ A Blei, ïa ka jingïaid jingjop jong me la ïohi da baroh, ka jingïaid paidbah jong U Blei, u syiem jong nga, sha ka jaka kyntang jong u.

²⁵ Ki nongrwai ki don ha khmat, ki nongtem nongput ki don hadien, hapdeng jong ki don ki samla kynthei kiba tem ïa ki kanjari:

²⁶ “To ïaroh ïa U Blei ha ka jingïakynduh lang jong ki briew jong u; to ïaroh ïa U Trai, phi ki khun ki ksiew baroh jong u Jakob!”

²⁷ Nyngkong u wan u Benjamin, ka jait kaba rit tam, nangta ki nongïalam jong ka Judah lem bad ka kynhun jong ki, ba la bud da ki nongïalam jong ka Sebulun bad Naphtali.

²⁸ To pynpaw ïa ka bor jong me, A Blei, ka bor kaba me la pyndonkam na ka bynta jong ngi

²⁹ na ka Templ jong me ha Jerusalem, ha kaba ki syiem ki wanrah ki jingai sngewbha sha me.

³⁰ To dumok ïa ka Ijipt, kata ka mradkhlaw hapoh ki khah; to dumok ïa ki jaitbynriew, kita ki kynhun jong ki masi kyrtong bad ki khun jong ki, tad haduh ma ki baroh kin dem ngon bad ai ha me ïa ka rupa jong ki. Pynsakma ïa kito ki briew kiba ieit ban ïaleh thma!

³¹ Ki nongkit 'tiensyiem kin wan na Ijipt; ki nong Sudan kin rah ïa la ki kti ha ka jingduwai ha U Blei.

³² To rwai ha U Blei, phi ki hima jong ka pyrthei; to rwai ki jingïaroh ïa U Trai,

³³ ha uta uba shong kulai halor ka sahit bneng, ka sahit bneng na mynbarim. To shahshkor ïa u ba u kyrhuh da ka jingkyrhuh bajam.

³⁴ To pynbna ïa ka bor ka jong U Blei; ka burom syiem jong u ka long halor ki Israel, ka bor jong u ka don ha ki sahit bneng.

³⁵ A katno uba itynnat eh long U Blei haba u wan na ka jaka kyntang jong u — U Blei jong ki Israel! U ai ka jingkhlaiñ bad ka bor ha ki briew jong u. To ïaroh ïa U Blei!