SALM 66 - Khasi CL Bible (BSI)

Ka jingrwai ïaroh bad jingrwai ainguh

¹ To ïaroh ïa U Blei da ki jingrisa jingkmen, phi ki briew baroh!

² To rwai pyndonburom ïa ka kyrteng jong u, to ai ha u ki jingïaroh pyndonburom!

³ To ong ha U Blei, “A katno kiba phylla long kiei kiei kiba me leh! Ka bor jong me ka long kaba khraw katta katta ba ki nongshun jong me ki dem ngon ha ka jingsheptieng ha khmat jong me.

⁴ Uwei uwei baroh ha ka pyrthei u mane ïa me; ki rwai ki jingïaroh ïa me, ki rwai ki jingïaroh ïa ka kyrteng jong me.”

⁵ To wan bad peit aïu U Blei u la leh, ki kam baphylla jong u hapdeng ki briew.

⁶ U pynkylla ïa ka duriaw sha ka dewryngkhiang; ki kpa tymmen jong ngi ki la jam lyngba ïa ka wah da ka kjat. Hangta ngi la ïashad kmen namar kaei kaba u la leh.

⁷ U synshar junom da ka borbah jong u bad u buh ïa la ki khmat halor ki jaitbynriew. Wat shah ïa ki nongïaleh pyrshah ban ïeng pyrshah ïa u.

⁸ To ïaroh ïa U Blei jong ngi, phi ki jaitbynriew baroh; ai ba yn sngew ïa ka jingïaroh jong phi.

⁹ U la ri pynim ïa ngi, bad um shym la shah ïa ngi ban kyllon.

¹⁰ Me la buh ïa ngi ha ka jingtynjuh, A Blei; kumba ïa ka rupa la phrang da ka ding kumta me la tynjuh ïa ngi.

¹¹ Me la shah ba ngin hap ha ka jingriam bad me la buh ki jingkit bakhia halor ki met jong ngi.

¹² Me la shah ïa ki nongshun jong ngi ban ïuh halor jong ngi; ngi la ïaid lyngba ïa ka ding bad ka jingshlei um, hynrei mynta me la wan ïalam ïa ngi sha ka jaka kaba shngain.

¹³ Ngan wallam ki jingainguh thang sha ka ïing jong me, ngan ai ha me ïa kaei kaba nga la kular.

¹⁴ Ngan ai ha me ïa kaei kaba nga la ong ba ngan ai mynba nga don ha ka jingjynjar.

¹⁵ Ngan ai ïa ka langbrot ba yn thang halor ka duwan; ngan kñia ki masi kyrtong bad ki blang, bad ka tdem kan kiew soit sha ka sahit bneng.

¹⁶ To wan bad to shahshkor, phi baroh kiba pyndonburom ïa U Blei, bad ngan ïathuh ïa phi ïa kaei kaba u la leh namar jong nga.

¹⁷ Nga la kyang jam ha u ban ïoh jingïarap, nga la ïaroh ïa u da ki jingrwai.

¹⁸ Lada ngam shym la suidñiew ïa ki pop jong nga, U Trai un ym jin da la shahshkor ïa nga.

¹⁹ Hynrei da shisha U Blei u la ïohsngew ïa nga; u la shahshkor ïa ka jingduwai jong nga.

²⁰ Nga ïaroh ïa U Blei, namar um shym la kyntait ïa ka jingduwai jong nga, lane weng noh ïa ka jingieit baneh jong u na nga.