SALM 62 - Khasi CL Bible (BSI)

Ka jingsngewskhem ha ka jingïada U Blei

¹ Nga ap da ka jingïaishah slem ïa U Blei ban pynim ïa nga; nga shaniah tang ha u hi.

² Tang ma u hi uba ïada bad pynim ïa nga; u long u nongkyrshan jong nga, bad ngan ym shahjop da lei lei.

³ Sa katno phi baroh phin tur ïaleh ïa u briew u bym khlaiñ kat ka jingker kaba la twa?

⁴ Phi kwah tang ban tan shapoh na ka kyrdan donburom jong u; phi sngewbha ha ki jinglamler. Phi kren ki kyntien kyrkhu, hynrei ha ka dohnud jong phi, phi tim ïa u.

⁵ Nga shaniah tang ha U Blei hi; nga buh ïa la ka jingkyrmen ha u.

⁶ Tang ma u hi uba ïada bad pynim ïa nga; u long u nongkyrshan jong nga, bad ngan ym shahjop da lei lei.

⁷ Ka jingpynim jong nga bad ka burom ka shong ha U Blei; u long u nongïada bakhlaiñ jong nga; u long ka jingda jong nga.

⁸ Shaniah ha U Blei ha ki por baroh, ko ki briew jong nga; ïathuh ha u ïa ki jingjynjar jong phi baroh, naba u long ka jakarieh jong ngi.

⁹ Ki briew ki long kum ka jingpynhiar mynsiem, kiba rit bad kiba khraw kumjuh kim dondor. Buh ïa ki ha ki tarajur, bad kim don jingkhia ei ei; ki kham sting ban ïa ka jingpynhiar mynsiem.

¹⁰ Wat buh ïa la ka jingshaniah ha ka jinglehbor; wat kyrmen ban ïoh myntoi ei ei da ka jinglute; wat haba ka spah jong phi ka roi, wat shaniah ha ka.

¹¹ Bunsien nga la ïohsngew ba U Blei u ong ba ka bor ka dei ka jong u

¹² bad ba ka jingieit jong u ka long kaba neh. Ma me hi, A Trai, me ainong ha uwei pa uwei kat kum ki jingleh jong u.