SALM 61 - Khasi CL Bible (BSI)

Ka jingduwai ban ïoh jingïada

¹ To sngew ïa ka jingïam jong nga, A Blei; to shahshkor ïa ka jingduwai jong nga!

² Ha ka jingduh jingkyrmen bad ha ka jingjngai na ïing nga khot kyrpad ïa me! To ïalam ïa nga sha ka jakarieh kaba shngain,

³ namar me long u nongïada jong nga, u nongkyrshan uba khlaiñ pyrshah ïa ki nongshun jong nga.

⁴ Ai ngan shong ha ka jaka kyntang jong me shi lynter ka jingim jong nga; ai ngan shem ka jingshngain hapoh ki thapniang jong me.

⁵ Me la ïohsngew ïa ki kular jong nga, A Blei, bad me la ai ha nga ïa kaei kaba dei ka jong kito kiba pyndonburom ïa me.

⁶ To pynlang shuh shuh bun ki snem ha ka jingim jong u syiem; ai ba un ïai im!

⁷ Ai un synshar junom ha ka jingdon ryngkat jong me, A Blei; to da ïa u da ka jingieit baneh bad ka jingïaineh ka jong me.

⁸ Kumta ngan ïai rwai ki jingïaroh ïa me, kumba nga ai ha me man ka sngi ïa kaei kaba nga la kular.