SALM 60 - Khasi CL Bible (BSI)

Ka jingduwai ïa ka jingpyllait

¹ Me la kyntait ïa ngi, A Blei, bad me la jop ïa ngi; me la bitar ïa ngi — hynrei mynta to phai pat sha ngi.

² Me la pynlong ïa ka ri ban kyiuh, bad me la ot rynghang ïa ka; mynta to pynkhiah ïa ki jingmong jong ka, namar ka la sdang ban twa.

³ Me la pynlong ïa ki briew jong me ban shahshitom shibun eh; ngi ïaid sheng sheng kum kiba la buaid.

⁴ Me la maham ïa kito kiba pynpaw jingtiengburom ïa me, khnang ba kin ïohlait na ka jingpynjot.

⁵ To pyllait im ïa ngi da ka borbah jong me; to jubab ïa ki jingduwai jong ngi, khnang ba ki briew kiba me ieit kin ïohlait im.

⁶ Na la ka jaka kyntang U Blei u la ong, “Ha ka jingjop ngan phiah ïa ka Shekhem bad pynbynta ïa ka Them Sukkoth sha ki briew jong nga.

⁷ Ka Gilead ka dei ka jong nga, bad ka Manasseh ruh; ka Ephraim ka dei ka jingda khlieh jong nga bad ka Judah u diengsynshar syiem jong nga.

⁸ Hynrei ngan pyndonkam ïa ka Moab kum ka jaka sait kti jong nga bad ngan bret ïa ki juti jong nga ha ka Edom, kum ka dak ba nga long trai ïa ka. Hato ki Philistia ki pyrkhat ba kin risa jam da ka jingjop halor jong nga?”

⁹ Mano, A Blei, u ban shim ïa nga sha ka nongbah ba la ker kynroh? Uei u ban ïalam ïa nga sha ki Edom?

¹⁰ Hato da shisha me la kyntait ïa ngi? Hato mem leit ïaid lang bad ki shipai jong ngi?

¹¹ To ïarap ïa ngi pyrshah ïa u nongshun; ka jingïarap briew kam dondor ei ei.

¹² Bad U Blei ha ka liang jong ngi ngin sa jop; un jop ïa ki nongshun jong ngi.