SALM 6 - Khasi CL Bible (BSI)

Ka jingduwai ban ïoh jingïarap ha ka por jynjar

¹ A Trai, wat bitar bad dumok ïa nga! wat pynshitom ïa nga ha ka jingbitar jong me!

² Nga la ringswai, A Trai; to isynei ïa nga! Pynshaitbor ïa nga; naba nga la lwait shikatdei

³ bad ka longrynïeng jong nga baroh kawei ka khuslai sat. Tad lano, A Trai, men nang ap ban ïarap ïa nga?

⁴ To wan bad pyllait im ïa nga, A Trai; ha ka jingisynei jong me to pyllait ïa nga.

⁵ Ha ka pyrthei kiba ïap ym don ba kynmaw ïa me; ym don mano mano ba lah ban ïaroh ïa me hangta.

⁶ Nga la ringswai da ka jingsngewsih sat; man ka miet ka jingthiah jong nga ka sngem na ka jingïam jong nga; ka syngkhlieh jong nga ka jhieh da ki ummat.

⁷ Ngam lah ban ïohi bha; ki khmat jong nga ki sieb shikatdei eh na ka jingïam kaba la pynmih da ki nongshun jong nga.

⁸ Kiar noh na nga, phi ki riewbymman! U Trai u shahshkor ïa ka jingïam jong nga;

⁹ u sngap ïa ka jingkyrpad jong nga ban ïoh jingïarap bad un jubab ïa ka jingduwai jong nga.

¹⁰ Ki nongshun jong nga kin tip ïa ka jinglehrain bakthang jong ka jingshahjop; ha ka jingshaïong bakynsan yn beh noh ïa ki.