SALM 57 - Khasi CL Bible (BSI)

Ka jingduwai ban ïoh jingïarap

¹ To leh-isynei ïa nga, A Blei, to leh-isynei, namar nga wan sha me ban ïoh jingshngain. Ha ka syrngiew jong ki thapniang jong me nga shem ka jingïada haduh ba ki 'erïong bajur ki kut noh.

² Nga khot kyrpad ïa U Blei, U Bahakhlieh Tam Eh, sha U Blei, uba pyndap ïa ki jingdonkam jong nga baroh.

³ Un jubab na bneng bad pynim ïa nga; un jop ïa kiba pynshitom beiñ ïa nga. U Blei un pyn-i ha nga ïa ka jingieit baneh jong u bad jingïaineh jong u.

⁴ Ïa nga la ker sawdong da ki nongshun, kiba long kum ki sing bathrang ïa ka doh briew. Ki bniat jong ki kum ki sum bad ki khnam; ki thylliej jong ki kum ki waitlam banep.

⁵ To pyn-i ïa ka jingkhraw jong me ha ka sahit bneng, A Blei, bad ïa ka burom jong me halor ka pyrthei baroh.

⁶ Ki nongshun jong nga ki la pyiar ïa ka jar ban kem ïa nga; la tyllep ïa nga da ka jingkhuslai. Ki tih ïa ka 'liewlep ha ka lynti ïaid jong nga, hynrei ki hap hi ïa lade ha ka.

⁷ Nga don ka jingshaniah tylli, A Blei; ngan rwai bad ïaroh ïa me!

⁸ To khie noh, ko mynsiem jong nga! To khie noh, ko ka duitara bad ka jingtem ksai jong nga! Ngan kyrsiew ïa ka sngi.

⁹ Ngan ainguh ïa me, A Trai, hapdeng ki hima. Ngan ïaroh ïa me hapdeng ki jaitbynriew.

¹⁰ Ka jingieit baneh jong me ka poi shaduh ki bneng; ka jingïaineh jong me ka kot sha ki sahit bneng.

¹¹ To pyn-i ïa ka jingkhraw jong me ha ka sahit bneng, A Blei, bad ïa ka burom jong me baroh sawdong ka pyrthei.