SALM 56 - Khasi CL Bible (BSI)

Ka jingduwai jong ka jingshaniah ha U Blei

¹ To leh-isynei ïa nga, A Blei, namar nga don ha ka jingshah tur ïaleh; ki nongshun jong nga ki pynshitom ïa nga man ka por.

² Baroh shi sngi lynter ki nongïaleh pyrshah jong nga ki tur ïaleh ïa nga. Ki don shibun eh kiba wan ïaleh pyrshah ïa nga.

³ Haba nga sheptieng, A Trai Badonbor Baroh, nga buh ïa ka jingshaniah ha me.

⁴ Nga shaniah ha U Blei bad ngam sheptieng; nga ïaroh ïa u na ka bynta kaei kaba u la kular. U briew un lah ban leh aïu ïa nga?

⁵ Ki nongshun jong nga ki pynlong jingjynjar ïa nga baroh shi sngi lynter; ki thmu borabor kumno ban pynmynsaw ïa nga!

⁶ Ki ïalumlang ha ki jakarieh bad ki peit-thuh ïa kiei kiei baroh kiba nga leh, da kaba kyrmen ban pynïap ïa nga.

⁷ Pynshitom ïa ki, A Blei, na ka bynta ka jingsniew jong ki, to jop ïa kito ki briew ha ka jingbitar jong me!

⁸ Me tip katno uba jynjar nga long; me la buh jingkheiñ ïa ki ummat jong nga. Hato ym shym la kyntiew ïa ki ha ka kitab jong me?

⁹ Ha ka sngi kaba nga khot kyrpad ïa me, ki nongshun jong nga kin phai pat. Nga tip ïa kane: U Blei u don ha ka liang jong nga —

¹⁰ U Trai, uba ïa ki jingkular jong u nga ïaroh.

¹¹ Ha u nga shaniah, bad ngan ym sheptieng. U briew un lah ban leh aïu ïa nga?

¹² A Blei, ngan ai ha me ïa kaei kaba nga la kular; ngan ai ha me ïa ki jingai jong ka jingainguh,

¹³ namar me la pyllait im ïa nga na ka jingïap bad sumar ïa nga na ka jingshahjop. Bad kumta nga ïaid ha ka jingdon ryngkat U Blei, ha ka jingshai kaba tyngshaiñ halor kiba im.