SALM 54 - Khasi CL Bible (BSI)

Ka jingduwai ïa ka jingïada na ki nongshun

¹ To pynim ïa nga da ka bor jong me, A Blei; pyllaitluid ïa nga da ka borbah jong me!

² To sngew ïa ka jingduwai jong nga, A Blei; to shahshkor ïa ki ktien jong nga!

³ Ki briew kiba sarong ki wan ban tur ïaleh ïa nga; ki briew kiba runar ki pyrshang ban pynïap ïa nga — ki briew ki bymsalia shaphang U Blei.

⁴ Hynrei U Blei u long u nongïarap jong nga. U Trai u long u nongkyrshan jong nga.

⁵ To ai ba U Blei un pyndonkam ïa ki kam sniew jong ki hi ban pynshitom ïa ki nongshun jong nga. Un pynjot ïa ki namar u long uba ïaineh.

⁶ Ngan ai da kaba kmen ïa ka jingkñia ha me, A Trai; ngan ainguh ïa me namar me long uba bha.

⁷ Me la pyllait im ïa nga na ki jingjynjar jong nga baroh, bad nga la ïohi ba ki nongshun jong nga ki la shahjop.