SALM 53 - Khasi CL Bible (BSI)

Ka jingbymman ki briew

¹ Kiba bieit ki ong ha lade, “Ym don Blei.” Ki baroh ki long kiba jakhlia, bad ki la leh ïa kiei kiei kiba shyrkhei; ym don uwei ruh uba leh ïa kaei kaba dei.

² U Blei u jngoh na bneng ïa u khunbynriew ban khmih lada don mano mano bastad, bad ba mane ïa U.

³ Hynrei baroh ki la kylla dien noh; ki la long lang kiba sniew baroh. Ym don uwei ruh na ki uba leh ïa kaei kaba dei, ym don uwei ruh.

⁴ “Hato kim tip?” U Blei u kylli. “Hato kine ki nongleh kam sniew kim tip ei ei? Ki im da kaba lute ïa ki briew jong nga, bad kim ju duwai ha nga.”

⁵ Hynrei pynban kin sngewshyrkhei shikatdei eh, kum bym pat ju long mynshuwa, naba U Blei un pynsaphred ïa ki shyieng jong ki nongshun jong ki briew jong U. U Blei u la kyntait ïa ki, bad kumta ki Israel kin jop thiaw ïa ki.

⁶ Katno nga duwai ba ka jingjop kan wan ha ki Israel na Seïon. Katno kan long ka jingkmen ki paid Israel haba U Blei u pyndap kyrhai biang ïa ki!