SALM 51 - Khasi CL Bible (BSI)

Ka jingduwai ïa ka jingmap-ei

¹ To isynei ïa nga, A Blei, namar ka jingieit baneh jong me. Namar ka jingisynei bakhraw jong me, to pyndam noh ïa ki pop jong nga!

² To sait ïa ka jingbymman jong nga baroh bad pynlong ïa nga uba khuid na ka pop jong nga!

³ Nga ithuh ïa ki jingpalat jong nga; nga sngewthuh borabor ïa ki pop jong nga.

⁴ Nga la leh pop pyrshah ïa me — pyrshah tang ïa me hi — bad leh ïa kaei kaba me ñiew kaba bymman. Te me la leh kaba dei ha ka jingbishar jong me; me lehhok haba me pynrem ïa nga.

⁵ Nga la long u bymhok naduh ka sngi ba la kha ïa nga; naduh ka por ba la pun ïa nga, nga la long uba pop.

⁶ Ka jinglonghok bad ka jingshisha ki long kiba me dawa; to pyndap ïa ka jingmut jong nga da ka jingstad jong me.

⁷ Weng noh ïa ka pop jong nga, bad ngan long khuid; sait ïa nga, bad ngan kham lieh ïa ka ïor.

⁸ Ai ngan ïohsngew ïa ki jingsawa jong ka jingkmen bad ka jingsngewbha; wat la me la pynlwet ïa nga bad pynpait ïa nga, ngan long uba kmen sa shisien pat.

⁹ To tap ïa ki khmat jong me na ki pop jong nga bad pyndam noh ïa ka jingbymhok jong nga baroh.

¹⁰ To pynlong ïa ka dohnud basngur hapoh jong nga, A Blei, bad buh ïa ka mynsiem kaba thymmai bad ba-beit hapoh jong nga.

¹¹ Wat pynjah noh ïa nga na ka jingdon ryngkat jong me; wat shim noh ïa U Mynsiem Bakhuid jong me na nga.

¹² To ai pat ha nga ïa ka jingkmen kaba wan na ka jingpynim jong me, bad pynlong ïa nga uba mon ban kohnguh ïa me.

¹³ Te ngan hikai ïa ki nongpop ïa ki hukum jong me, bad kin phai pat sha me.

¹⁴ To pynsah ïa ka jingim jong nga, A Blei, bad pyllait im ïa nga, bad ngan pynbna da kaba kmen ïa ka hok jong Me.

¹⁵ Ïarap ïa nga ban kren, A Trai, bad ngan ïaroh ïa me.

¹⁶ Mem kwah ïa ki jingkñia, ne ngan jin da la ai ïa ki; mem sngewbha ïa ki jingainguh thang.

¹⁷ Ka jingkñia jong nga ka long ka mynsiem kaba sngewrit, A Blei; men ym kyntait ïa ka dohnud kaba sngewrit bad ba la kylla-kaba-mut.

¹⁸ A Blei, to lehbha ïa ka Seïon bad to ïarap ïa ka; to tei pat ïa ki kynroh ka Jerusalem.

¹⁹ Te men ïoh ka jingsngewbha da ki jingkñia kiba dei bad da ki jingainguh thang jong ngi; bad ïa ki masi kyrtong yn kñia halor ka duwan jong me.