SALM 5 - Khasi CL Bible (BSI)

Ka jingduwai ban ïoh jingïada

¹ To shahshkor ïa ki ktien jong nga, A Trai; bad sngap ïa ki jingud jong nga.

² To shahshkor ïa ka jingkyang jong nga ban ïoh jingïarap, A U Blei jong nga bad u syiem jong nga! Nga duwai ha me, A Trai;

³ mynstep me ïohsngew ïa ka sur jong nga; ha ka por mih sngi nga ai ka jingduwai jong nga; bad nga ap ïa ka jingjubab jong me.

⁴ Mem long U Blei uba sngewbha ïa ka jingleh bymdei; mem shah ïa kaba sniew ha khmat jong me.

⁵ Mem lah shah ban ïohi ïa kiba sarong; me isih ïa ki riewbymman baroh.

⁶ Me pynjot ïa ki nongkren lamler baroh bad me isih ïa riewlehbor, ïa ki riewshukor.

⁷ Hynrei namar ka jingieit kaba khraw jong me nga lah ban wan shapoh ka ïing jong me; nga lah ban mane ha ka Templ kaba khuid jong me bad ban mane dem ïa me da ka jingtiengburom.

⁸ A Trai, nga don bun bah ki nongshun! Ïalam ïa nga ban leh ïa ka mon jong me; pynlong ïa ka lynti jong me kaba jem ïa nga ban bud.

⁹ Kaei kaba ki nongshun jong nga ki kren ka long ka bym lah da lei lei ban shaniah; ki kwah tang ban pynjot. Ki ktien jong ki, ki long kiba pynroh bad kiba jali ja-um, hynrei kiba dap da ka jingshukor kaba shyrkhei.

¹⁰ Pynrem bad pynshitom ïa ki, A Blei; ai ba ki jingsylla jong ki kin pynjot ïa ki. Beh noh ïa ki na ka jingdon ryngkat jong me namar ki pop babun jong ki bad ka jingïaleh pyrshah jong ki ïa me.

¹¹ Hynrei baroh kiba shem ka jakarieh ha me kin shadkmen; ki lah borabor ban rwai da kaba kmen. To ïada ïa kito kiba ieit ïa me; namar jong me ki da kmen shisha.

¹² Me kyrkhu ïa kito kiba kohnguh ïa me, A Trai; ka jingieit jong me ka da ïa ki kum ka stieh.