SALM 49 - Khasi CL Bible (BSI)

Ka jingbieit jong ka jingshaniah ha ka spah

¹ To sngap ïa kane, ma phi baroh! To shahshkor, baroh ki briew ha kylleng,

² kiba rit bad kiba khraw kumjuh, kiba duk bad kiba riewspah baroh lang.

³ Ki jingmut jong nga kin sa shai; ngan kren ïa ki ktien jong ka jingstad.

⁴ Ngan pynphai ïa ka jingmut jong nga sha ki proberb bad ngan batai ïa ki jingmut jong ki katba nga dang tem ïa ka duitara.

⁵ Ngam sheptieng ha ki por jong ka jingma haba ïa nga la kerkut da ki nongshun,

⁶ da ki briew kiba sniew kiba shaniah ha ka spah jong ki bad kiba sarong ïa la ka spah bakhraw jong ki.

⁷ U briew un ym lah lano lano ruh ban pynim ïa lade; un ym lah ban siew ïa U Blei ïa ka dor jong ka jingim jong u,

⁸ namar ka jingsiew na ka bynta ka jingim u briew ka khraw palat. Kaei kaba u lah ban siew kan ym long kaba biang da lei lei ruh

⁹ ban pyllait ïa u na ka jingtep, ka ban pynlah ïa u ban im junom.

¹⁰ Uno uno u lah ban ïohi ba wat ki briew kiba stad ki ïap, kumjuh kum ki briew kiba bieit bad kiba mutlop. Baroh ki iehnoh ïa ka spah jong ki ha kiba hiarpateng.

¹¹ Ki jingtep jong ki, ki long ki ïing jong ki junom; hangta ki don baroh shi rta, wat la shisien ki don ki jaka puta la ki jong hi.

¹² Ka jingkhraw u briew kam lah ban pynim ïa u na ka jingïap; un ïap hi kum ki mrad.

¹³ Khmih kaei kaba jia ïa kito kiba shaniah ha lade, ka kupar jong kito kiba sngewhun bad ka spah jong ki —

¹⁴ kin kut ha kaba ïap kum ki langbrot, bad ka Jingïap kan long u nongaplangbrot jong ki. Kiba hok kin jop halor jong ki, katba ki met jong ki kin pyut kloi ha ka pyrthei kiba ïap, jngai na ki ïing jong ki.

¹⁵ Hynrei U Blei un pyllait ïa nga; un pynim ïa nga na ka bor jong ka jingïap.

¹⁶ Wat bitar haba u briew u riewspah, wat haba ka spah jong u ka nang roi kham khraw;

¹⁷ un ym lah ban rah ïa ka haba un ïap; ka spah jong u kan ym lah ban leit bad u sha ka jingtep.

¹⁸ Wat lada u briew u sngewhun bad kane ka jingim bad ba la ïaroh ïa u ba u long uba jop,

¹⁹ un ïadon lang bad ki kpa tymmen jong u baroh ha ka jingïap, ha kaba ka jingdum ka neh junom.

²⁰ Ka jingkhraw u briew kam lah ban pynim ïa u na ka jingïap; un ïap hi kum ki mrad.