SALM 47 - Khasi CL Bible (BSI)

U nongsynshar uba ha khlieh tam

¹ To thab ïa la ki kti da ka jingkmen, phi ki jaitbynriew baroh! Ïaroh ïa U Blei da ki jingrwai bajam!

² U Trai, u Bahakhlieh Tam Eh, u long uba dei ban sheptieng; U long u syiem bakhraw, uba synshar halor ka pyrthei baroh.

³ U ai ïa ngi ka jingjop halor ki jaitbynriew; u pynlong ïa ngi ban synshar halor ki hima.

⁴ U la jied na ka bynta jong ngi ïa ka ri ha kaba ngi shong ngi sah, ka jingïohkynti basngewsarong jong ki briew jong u, ïa kiba u ieit.

⁵ U Blei u kiew sha ka khet jong u. Ki don ki jingpyrta jong ka jingkmen bad ki jingput bajam ïa ki turoi, katba U Trai u kiew shalor.

⁶ To rwai ka jingïaroh ïa U Blei; to rwai ka jingïaroh ïa u syiem jong ngi!

⁷ U Blei u dei u syiem halor ka pyrthei baroh; to ïaroh ïa u da ki jingrwai!

⁸ U Blei u shong ha ka khet bakyntang jong u; u synshar halor ki hima.

⁹ Ki nongsynshar jong ki hima ki ïalum bad ki briew jong U Blei jong u Abraham. U long ma u, uba kham khlaiñ ban ïa baroh ki kynhun shipai; u synshar halor baroh.