SALM 44 - Khasi CL Bible (BSI)

Ka jingduwai na ka bynta ka jingïada

¹ Da la ki jong ki shkor ngi la ïohsngew ïa ka, A Blei — ki kpa tymmen jong ngi ki la ïathuh ïa ngi shaphang jong ka, shaphang kiei kiei kiba khraw kiba me la leh ha ka por jong ki, ha ki sngi ba-mynshuwa eh:

² Kumno ba ma me hi me la beh noh ïa kiba mane blei thala bad pynshong neh ïa ki briew jong me ha ka ri jong ki; kumno me la pynshitom ïa kiwei pat ki jaitbynriew bad pynlong ïa la ki jong ban roi kyrhai.

³ Ki briew jong me kim shym la jop ïa ka ri da ki waitlam jong ki; kim shym la jop ïa ka da ka bor jong ki hi; ka la long da ka bor jong me bad ka jingkhlaiñ jong me, da ka jingthikna jong ka jingdon ryngkat jong me, kaba pyn-i ba me ieit ïa ki.

⁴ Me long u syiem jong nga bad U Blei jong nga; me ai jingjop ïa ki briew jong me,

⁵ bad da ka bor jong me ngi jop ïa ki nongshun jong ngi.

⁶ Ngam shaniah ha ka ryntieh jong nga lane ha ka waitlam jong nga ban pynim ïa nga;

⁷ hynrei me la pynim ïa ngi na ki nongshun jong ngi bad me la jop ïa kito kiba shun ïa ngi.

⁸ Ngin ïaroh ïa me borabor bad ai ki jingsngewnguh ïa me junom.

⁹ Hynrei mynta me la kyntait ïa ngi bad pynlong ïa ngi ban shahjop; mem tur shuh ryngkat bad ki kynhun shipai jong ngi.

¹⁰ Me pynlong ïa ngi ban phet krad na ki nongshun jong ngi, bad ki shim ha lade ïa kaei kaba dei ka jong ngi.

¹¹ Me shah ïa ngi ban shah pynïap kput kum ki langbrot; me pynsakma ïa ngi sha ki ri nongwei.

¹² Me la die ïa la ki jong ki briew jong me hi ha ka dor kaba rit i kumba ki don tang khyndiat eh ka dor.

¹³ Ki paramarjan jong ngi ki ïohi ïa kaei kaba me leh ïa ngi, bad ki krenbeiñ ïa ngi bad ki rkhie ïa ngi.

¹⁴ Me la pynlong ïa ngi kum ka jingshah ñiewbeiñ hapdeng ki jaitbynriew; ki pynkhih ïa la ki khlieh bad krenbeiñ ïa ngi.

¹⁵ Nga la don borabor hapdeng ka jingjahburom; la tap ïa nga da ka jinglehrain na kaba ïohsngew

¹⁶ ïa ki jingshah krenbeiñ bad ki jingñiewbeiñ na ki nongshun jong nga bad kito kiba isih ïa nga.

¹⁷ Kane baroh ka la wan jia ha ngi, wat la ngim shym la klet noh ïa me lane pynkheiñ ïa ka jutang kaba me la ïateh bad ngi.

¹⁸ Ngim shym la long ki bymïaineh ha me; ngim shym la long ki bymkohnguh ïa ki hukum jong me.

¹⁹ Pynban me la iehnoh khlem jingïarap ïa ngi hapdeng ki mradkhlaw; me la iehnoh ïa ngi hapdeng ka jingdum tliw tliw.

²⁰ Lada ngi la sangeh noh na kaba mane ïa U Blei jong ngi bad duwai ha u blei nongwei,

²¹ Da shisha men jin da la shem ïa kata, namar me tip ïa ki jingmut barieh jong ngi.

²² Hynrei ka dei na ka bynta jong me, ba ïa ngi la pynïap noh man la ka por, ba la pynlong ïa ngi kum ki langbrot ba dei ban shah pynïap.

²³ To khie noh, A Trai! Balei ba me ïohthiah? To kyndit noh! Wat kyntait ïa ngi junom!

²⁴ Balei ba me buhrieh na ngi? Wat klet ïa ka jingshitom bad ka jingjynjar jong ngi!

²⁵ Ngi kyllon kiba la shah khñiot ha khyndew; ngi thiah ha u pui pui ha ka jingshahjop.

²⁶ To wan ban ïarap ïa ngi! Namar ka jingieit baneh jong me, to pynim ïa ngi!