SALM 41 - Khasi CL Bible (BSI)

Ka jingduwai jong u briew uba pang

¹ Suk kito kiba sngewlem ïa kiba duk; U Trai un ïarap ïa ki haba ki hap ha ka jingjynjar.

² U Trai un ïada ïa ki bad pynsah ïa ki jingim jong ki; un pynlong ïa ki, kiba suk ha ka ri; un ym iehnoh ïa ki ha ka bor jong ki nongshun jong ki.

³ U Trai un ïarap ïa ki haba ki pang bad un ai pat ha ki ïa ka jingkoit jingkhiah.

⁴ Nga ong, “Nga la leh pop pyrshah ïa me, A Trai; to isynei ïa nga bad pynkhiah ïa nga.”

⁵ Ki nongshun jong nga ki ong kiei kiei kiba shyrkhei shaphang jong nga. Ki kwah ba ngan ïap noh bad ba yn klet noh.

⁶ Kito kiba wan ban khmih ïa nga, ki shu wan leh mynleh; ki lum ka khubor basniew shaphang jong nga bad nangta ki leit bad ïathuh ïa ka kylleng.

⁷ Baroh kiba isih ïa nga ki kren sop sop para ma ki shaphang jong nga, ki mutdur ïa kaba sniew tam shaphang jong nga.

⁸ Ki ong, “U don ka jingpang kaba un sa ïap noh shen; un ym lah ban hiar shuh na ka jingthiah jong u.”

⁹ Wat u paralok babha tam jong nga, uta uba nga shaniah tam, uta uba ju ïadon bynta na ka jingbam jong nga, u la phai pyrshah ïa nga.

¹⁰ To isynei ïa nga, A Trai, bad to pynïoh pat ïa ka jingkoit jingkhiah jong nga, bad ngan siew kylliang ïa ki nongshun jong nga.

¹¹ Kin ym lah ban jop ïa nga, ba kumta ngan tip ba me sngewbha ïa nga.

¹² Men ïarap ïa nga, namar nga leh ïa kata kaba dei; men buh ïa nga ha ka jingdon jong me junom.

¹³ Ïaroh ïa U Trai, U Blei ki Israel! Ïaroh ïa u mynta bad junom! Amen! Amen!