SALM 40 - Khasi CL Bible (BSI)

Ka jingrwai ïaroh

¹ Nga la ap da ka jingïaishah ïa ka jingïarap jong U Trai; te u la shahshkor ïa nga bad u la ïohsngew ïa ka jingkyang jong nga.

² U la sei ïa nga na ka thliew ba-ishyrkhei, na ka ahor ktieh bapynïap, bad u la buh ïa nga halor u mawsiang, bad u la pynlong skhem ïa nga.

³ U hikai ïa nga ban rwai ïa ka jingrwai bathymmai, ka jingrwai ïaroh ïa U Blei jong ngi. Kiba bun kiba ïohi ïa kane kin ïoh jingmaham, bad kin buh ïa la ka jingshaniah ha U Trai.

⁴ Suk kito kiba shaniah ha U Trai, ki bym phai sha ki bleithaw, lane kiba ïasoh bad kito kiba mane ïa ki blei thala.

⁵ Me la leh shibun kiei kiei na ka bynta jong ngi, A Trai U Blei jong ngi, ym don shuh uba kum ma me! Me la pynlong shibun ki jingthmu baphylla na ka bynta jong ngi. Ngam lah shuh ban ïathuh ïa ki baroh — Ka jingbun jong ki ka long kaba khraw eh!

⁶ Ïa ki jingkñia bad ki jingainguh mem kwah; ïa ki mrad thang tylli halor ka duwan mem shym la pan lane ïa ki jingkñia ki ban shim noh ïa ki pop.

⁷ Pynban, me la ai ha nga ïa ki shkor ban sngew ïa me, bad kumta nga jubab, “Nga hangne; ki jingbthah jong me ïa nga ki don ha ka kitab ka Hukum.

⁸ Katno nga ieit ban leh ïa ka mon jong me, A U Blei jong nga! nga ri kyndong ïa ka jinghikai jong me ha ka dohnud jong nga.”

⁹ Ha ka jingïaseng bah jong ki briew jong me baroh, A Trai, nga la pynbna ïa ka khubor babha ba me pynim ïa ngi; me tip ba ngan ym sangeh ban ïathuh ïa ka.

¹⁰ Ngam shym la buh tang ha lade ïa ka khubor ka jingpynim; nga ïai kren borabor ïa ka jingïaineh bad ka jingïarap jong me. Ha ka jingïaseng bah jong ki briew jong me baroh ngam shym la sngap jar Shaphang ka jinglonghok bad ka jingieit baneh jong me.

¹¹ A Trai, nga tip ba men ym sangeh noh kaba leh-isynei ïa nga, ka jingieit bad ka jingïaineh jong me kin ri pynim ïa nga borabor.

Ka jingduwai ban ïoh jingïarap

¹² Ïa nga la ker sawdong da shibun ki jingjynjar — Shibun eh ban ñiew! ki pop jong nga ki la lap ïa nga, bad ngam lah shuh ban ïohi; ki kham bun ban ïa u shñiuh ha ka khlieh jong nga; bad nga la duh ka jingshlur jong nga.

¹³ To pyllait im ïa nga, A Trai! Ïarap ïa nga mynta!

¹⁴ Ai ba kito kiba pyrshang ban pynïap ïa nga kin shahjop khoit bad dum buit. Ai ba kito kiba kmen namar ki jingjynjar jong nga yn pynphai pat bad pynjahburom.

¹⁵ Ai ba kito kiba kynkok ïa nga, kin shaïong ngaiñ da ka jingshahjop jong ki.

¹⁶ Ai ba kito baroh kiba wan sha me kin lehkmen bad sngewkmen. Ai ba kito baroh kiba ainguh ïa ka jingpynim jong me kin ong borabor, “Katno khraw long U Trai!”

¹⁷ Nga long uba tlot bad uba duk; A Trai, hynrei mem shym la klet ïa nga. Me long u nongpynim jong nga bad U Blei jong nga — to pynkloi ban ïarap ïa nga!