SALM 39 - Khasi CL Bible (BSI)

Ka jingphla u briew uba shahshitom

¹ Nga la ong, “Ngan da sumar bha ïa kaei ba nga leh, bad ngan ym shah ïa u thylliej jong nga ban pynleh pop ïa nga; ngan ym ong ei ei katba ki briew basniew ki dang don hajan.”

² Nga la sngap jar, ngam shym kren wat tang shikyntien ruh, wat shaphang kaei kaei kaba bha! Hynrei ka jingshitom jong nga ka nang jur, bad nga la shahjop da ka jingkhuslai.

³ Katba nga nang pyrkhat, katta nga nang sngew jynjar; ngam lah kun shuh khlem da kylli:

⁴ “Ko Trai, sa katno slem ngan im? Lano ba ngan ïap? To ïathuh ïa nga shen katno ka jingim jong nga kan kut?”

⁵ Katno kaba lyngkot me la pynlong ïa ka jingim jong nga! ha khmat jong me ka jingim jong nga kam long ei ei. Shisha man u briew uba im um don shuh hynrei tang ka jingpyrsad ka lyer, um don shuh hynrei tang ka syrngiew.

⁶ Baroh kaba u leh kam long ei ei; u lum spah, hynrei um tip uei u ban ïoh ïa ka.

⁷ Te, ïa-ei ngan dang ap kyrmen, A Trai? Nga buh ka jingkyrmen ha me.

⁸ To pynim ïa nga na ki pop jong nga baroh, bad wat shah ba kiba bieit kin rkhiebeiñ ïa nga.

⁹ Ngan sngap jar, ngan ym ong wat tang shikyntien ruh, namar dei ma me uta uba pynlong ïa nga ban shitom kumne.

¹⁰ Wat pynshitom shuh ïa nga; nga la jan ïap na ki jingshoh jong me.

¹¹ Me pynshitom ïa ki pop u briew da ki jingsneng sympat jong me, bad kum u khñiang me pynjot ïa kaei kaba u ieit. Da shisha u briew um don shuh hynrei tang ka jingpyrsad ka lyer.

¹² To sngew ïa ka jingduwai jong nga, A Trai, bad to shahshkor ïa ka jingkyang jong nga; wan ban ïarap ïa nga haba nga ïam. Kum ki kpa tymmen jong nga baroh nga long tang u nongshong basa shipor jong me.

¹³ Iehnoh ïa nga marwei khnang ba nga lah ban ïoh khyndiat ka jingsuk shuwa ba ngan khlad noh bad ngam don shuh.