SALM 38 - Khasi CL Bible (BSI)

Ka jingduwai u briew uba shahshitom

¹ A Trai, wat pynshitom ïa nga ha ka jingbitar jong me!

² Me la pynmynsaw ïa nga da ki khnam jong me; me la pynkyllon ïa nga.

³ Namar ka jingbitar jong me, nga don ha ka jingpang bajur; ka met jong nga baroh kawei ka pang namar ki pop jong nga.

⁴ Nga la jyllop ha ka jingshlei ki pop jong nga; ki long ka jingkit kaba khia eh ban bah.

⁵ Namar ka jingbieit jong nga ki jingmong jong nga ki iwkhong bad ki pyut,

⁶ nga la kdor ryngkdung, nga la shah pynlwet; nga shu ïam sngewsih sah baroh shi sngi.

⁷ Nga la khluit da ka jingpang shit, bad nga la jan ïap.

⁸ Nga la tlot hi ïan, bad nga la lwet jin; ka dohnud ka jynjar bad nga ud ha ka jingpang.

⁹ A Trai, me tip ïa kaei kaba nga thrang eh, me ïohsngew ïa ki jingud jong nga baroh.

¹⁰ U klongsnam jong nga u tied, ka jingkhlaiñ jong nga ka la duh, bad ki khmat jong nga ruh kim shai shuh.

¹¹ Ki paralok bad ki paramarjan jong nga kin ym wan hajan jong nga, namar ki jingmong jong nga; wat ki ba-ha-ïing ha-sem jong nga ki ïeng jngai na nga.

¹² Kito kiba kwah ban pynïap ïa nga ki pynap jingriam ïa nga; bad kito kiba kwah ban pynmynsaw ïa nga ki byrngem ban pynjot ïa nga; kim ju sangeh ban ïasylla pyrshah ïa nga.

¹³ Nga long kum u briew uba kyllut bad ngam ïohsngew, kum u briew u bymnang kren bad ngam lah kren.

¹⁴ Nga long kum u briew u bym lah ban jubab, namar um lah ban ïohsngew.

¹⁵ Hynrei nga shaniah ha me, A Trai; bad me, A Trai U Blei jong nga, u ban jubab ïa nga.

¹⁶ Wat shah ba ki nongshun jong nga kin risa halor ki jingsngewsih jong nga; wat ai ba kin kob sarong ha ka jinghap jong nga!

¹⁷ Nga la jan kyllon, bad nga ïai pang sah.

¹⁸ Nga phla ïa la ki pop, ki pyndap ïa nga da ka jingkhuslai.

¹⁹ Ki nongshun jong nga ki long kiba shait bakhlaiñ, don bun kiba isih ïa nga khlem daw.

²⁰ Kito kiba siew kylliang da kaba sniew ïa kaba bha ki pyrshah ïa nga namar nga pyrshang ban leh ïa kaba dei.

²¹ Wat iehnoh ïa nga, A Trai! wat long jngai na nga, A U Blei jong nga!

²² To ïarap ïa nga mynta, A Trai, u nongpynim jong nga!