SALM 36 - Khasi CL Bible (BSI)

Ka jingbymman u briew

¹ Ka pop ka kren ha u riewbymman shapoh eh ka dohnud jong u; u kyntait ïa U Blei bad um don ka jingtiengburom ïa u.

² Namar u pyrkhat khraw eh ïa lade, u pyrkhat ba U Blei un ym lap ïa ka pop jong u bad pynrem ïa ka.

³ Ka jingkren jong u ka long kaba thala bad kaba dap da ka jingshukor; um shym leh shuh ïa kaba dei bad kaba bha.

⁴ U thaw ki jingthmu basniew katba u dang don ha jingthiah; ym don kaba u leh kaba long kaba bha bad um ju kyntait ïa kano kano kaba sniew.

Ka jingbha U Blei

⁵ A Trai, ka jingieit baneh jong me, ka kot haduh ki bneng; ka jingïaineh jong me ka kynjoh haduh ki sahit bneng.

⁶ Ka hok jong me ka kerkut kum ki lumbah, ka jingbishar hok jong me ka long kum ki jingjylliew ka duriaw, ki briew bad ki mrad ki don ha ka jingsumar jong me.

⁷ Katno kaba kordor, A Blei, ka long ka jingieit baneh jong me! Ngi ïoh jingïada hapoh ka syrngiew ki thapniang jong me.

⁸ Ngi khawai ha ka jingpahuh ka jingbam ba me ai; me ai ïa ngi ban dih na ka wah ka jingbha jong me.

⁹ Me long ka tyllong jong ka jingim baroh; bad namar ka jingshai jong me ngi ïohi ïa ka jingshai.

¹⁰ To ïai ieit ïa kito kiba ithuh ïa me bad ban lehbha ïa kito kiba hok.

¹¹ Wat shah ïa ki briew kiba sarong ban tur ïaleh ïa nga ne ïa ki briew bymman ban pynher krad ïa nga.

¹² Khmih shano ki riewsniew ki hap, hangtai ki thiah, bad kim lah khie shuh.