SALM 34 - Khasi CL Bible (BSI)

Kaba rwai ïaroh ïa ka jingbha U Blei

¹ Ngan ïai ainguh ïa U Trai borabor; ngan ym sangeh ban ïai ïaroh ïa u.

² Ngan ïaroh ïa u ïa kaei ba u la leh ai ba kiba shah lehbeiñ baroh kin shahshkor bad kin kmen.

³ To pynbna ryngkat bad nga ïa ka jingkhraw U Trai, to ngin ïaroh lang ïa ka kyrteng jong u!

⁴ Nga la duwai ha U Trai, bad u la jubab ïa nga, u la pyllait ïa nga na ki jingsheptieng jong nga baroh.

⁵ Kiba shah banbeiñ ki khmih sha u bad ki kmen; kin ym kutlad lano lano.

⁶ Ki bym don jingïarap ki kyrpad ïa u, bad u jubab; u pyllait im ïa ki baroh na ki jingjynjar jong ki baroh.

⁷ U angel jong u, u ap phira ïa kito kiba pyndonburom ïa U Trai, bad u pyllait ïa ki na ka jingma.

⁸ To mad da lade katno U Trai u long uba bha. Suk kita kiba shem jingshngain ha u!

⁹ To pyndonburom ïa U Trai, phi ki briew jong u baroh; kito kiba kohnguh ïa u kin ïoh ïa baroh kat kaba ki donkam.

¹⁰ Wat ki sing ki shahthngan namar ba ki kyrduh jingbam, hynrei kito kiba kohnguh ïa U Trai kin ym duna ïa kaei kaei kaba bha.

¹¹ Ale, ko ki paralok samla jong nga, to shahshkor ïa nga, bad ngan hikai ïa phi ban pyndonburom ïa U Trai.

¹² Hato phi kwah ban lehkmen ha ka jingim? Hato phi kwah ban im slem bad im suk?

¹³ Te sumar na kaba kren sniew, bad na kaba kren lamler.

¹⁴ To phai noh na kaba sniew bad leh ïa kaba bha; wad ïa ka jingsuk da ka dohnud jong phi baroh.

¹⁵ U Trai u khmih sumar ïa kiba hok, bad u shahshkor ïa ki jingïam jong ki;

¹⁶ Hynrei u ïaleh pyrshah ïa kito kiba leh bymman, khnang ba haba ki ïap, ïa ki la klet noh shen shen.

¹⁷ Kiba hok ki khot kyrpad ïa U Trai, bad u shahshkor, u pyllait ïa ki na ki jingjynjar jong ki baroh.

¹⁸ U Trai u don hajan jong kito kiba tlot mynsiem; u pyllait im ïa kito kiba duh lut ïa ka jingkyrmen.

¹⁹ U briew uba bha u mad bun ki jingjynjar, hynrei U Trai u pyllait im ïa u na ki baroh.

²⁰ U Trai u tyngkai pura ïa u; wat kawei na ki shyieng jong u kan ym kheiñ.

²¹ Ka jingsniew kan pynïap ïa ki bymman; kito kiba isih ïa kiba hok kin shah pynshitom.

²² U Trai un pyllait im ïa ki briew jong u; kito kiba phet sha u ban ïoh jingïada kin lait im.