SALM 32 - Khasi CL Bible (BSI)

Ka jingphla bad ka jingmap-ei

¹ Suk kito kiba ïa ki pop la map noh, ïa ki jingleh bymdei la map ei.

² Suk uta u briew ïa uba U Trai um shym mudui ïa ka jingleh bymdei bad ha uba la pyllaitluid na ka jingshukor baroh.

³ Haba ngam shym la phla ïa ki pop jong nga, nga la thait na kaba ïam baroh shi sngi.

⁴ Mynsngi bad mynmiet me pynshitom ïa nga, A Trai; ka jingkhlaiñ jong nga ka la tyrkhong lut kum ka umjer ba la ryngkhiang da ka jingshit ka lyiur.

⁵ Te nga la phla ïa la ki pop ha me, ngam shym la buhrieh ïa la ki jingleh bymdei, nga la kut jingmut ban phla ïa ki ha me bad me la map ïa ki pop jong nga baroh.

⁶ Kumta baroh ki briew kiba hok ai kin duwai sha me ha ki por badonkam; haba ka jingshlei jong ka jingjynjar ka wan tur shapoh, kan ym lah ban poi sha ki.

⁷ Me long ka jakarieh jong nga; men pyllait im ïa nga na ka jingjynjar; nga rwai jam ïa ka jingpynim jong me, namar ba me ïada ïa nga.

⁸ U Trai u ong, “Ngan hikai ïa me ïa ka lynti ha kaba me dei ban leit; ngan hikai ïa me bad ai jingmut ïa me.

⁹ Wat long uba bieit kum u kulai ne u khashor, ïa uba hap ban pynïaid da u nar-bniat bad u lakam, ban pynlong ïa u ban pyndem.”

¹⁰ Ki bymman kin shahshitom, hynrei ïa kito kiba shaniah ha U Trai yn ïada ïa ki da ka jingieit baneh jong u.

¹¹ Phi kiba hok, to lehkmen bad to shadkmen, namar ïa kaei ba U Trai u la leh, phi kiba kohnguh ïa u, to risa jam da ka jingkmen!