SALM 31 - Khasi CL Bible (BSI)

Ka jingduwai jong ka jingshaniah ha U Blei

¹ Nga wan sha me, A Trai, na ka bynta ka jingïada; wat shah ïa nga ba ngan shahjop. Me long U Blei uba hok; to pyllait im ïa nga, nga duwai!

² To sngew ïa nga! Pynim ïa nga mynta! To long ka jakarieh jong nga ban ïada ïa nga; to long ka jingkyrshan jong nga ban pyllait im ïa nga.

³ Me long ka jakarieh bad ka jingkyrshan jong nga; to kdew lynti bad ïalam ïa nga kumba me la kular.

⁴ Sumar kyndong ïa nga na ka jingriam kaba la buh ha khmat jong nga; to da ïa nga na ka jingma.

⁵ Nga buh ïa lade ha ka jingsumar jong me; men pynim ïa nga, A Trai; me long U Blei uba ïaineh.

⁶ Me isih ïa kito kiba mane ïa ki blei thala, hynrei nga shaniah ha me.

⁷ Ngan lehkmen bad shadkmen namar ka jingieit baneh jong me. Me ïohi ïa ka jingshah shitom jong nga; me tip ïa ki jingjynjar jong nga.

⁸ Mem shym la shah ïa ki nongshun jong nga ban knieh ïa nga; me la ai laitluid ïa nga ban leit kat shaba nga mon.

⁹ To leh-isynei ïa nga, A Trai, naba nga long ha ka jingjynjar; ki khmat jong nga ki la thait na shibun eh ki jingïam; nga la duh bor lut.

¹⁰ Nga la thait hi ïan da ka jingsngewsih, bad ka jingïam ka la pynlyngkot ïa ka jingim jong nga. Nga tlot na ka jingjynjar jong nga baroh; wat ki shyieng jong nga ki la duh khoit.

¹¹ Baroh ki nongshun jong nga bad khamtam ki paramarjan jong nga, ki la ñiewbeiñ ïa nga; kito kiba ithuh ïa nga ki la sheptieng ïa nga; haba ki ïohi ïa nga ha ka surok bah, ki phet noh.

¹² Baroh ki la klet ïa nga, la kumba nga la ïap; nga long kum kaei re kaei kaba la bret noh,

¹³ Nga ïohsngew shibun ki nongshun ki ïa-pasiaw; ka jingma ka long ha baroh sawdong ïa nga. Ki ïathaw ki lad pyrshah ïa nga, ki ïasuhbuit ban pynïap ïa nga.

¹⁴ Hynrei ka jingshaniah jong nga ka long ha me, A Trai; me long U Blei jong nga.

¹⁵ Nga long borabor ha ka jingsumar jong me; pyllait im ïa nga na ki nongshun jong nga, na kito kiba pynshitom ïa nga.

¹⁶ To khmih ha la u jong u shakri da ka jingsbun; to pynim ïa nga ha ka jingieit baneh jong me.

¹⁷ Nga khot kyrpad ïa me, A Trai; wat ai ban pynlehrain ïa nga. Ai ba ïa ki bymman yn pynlehrain; ai ba kin leit jar jar shapoh ka pyrthei kiba ïap.

¹⁸ To pynsngap jar ïa kito ki nongshukor — Baroh kiba sngewsarong bad sngewmeng kiba kren da ka jingñiewbeiñ shaphang ki briew kiba hok.

¹⁹ Katno ki long kiba phylla kiei kiei kiba bha ba me sumar ïa kito kiba pyndonburom ïa me! Baroh ki tip katno me long uba bha, katno skhem ka jingïada jong me ïa kito kiba shaniah ha me.

²⁰ Me buhrieh ïa ki ha ka jingshngain jong ka jingdon ryngkat jong me, na ki jingïasuhbuit ki briew; ha ka jakarieh bashngain me buhrieh ïa ki na ka jingpynrem ki nongshun jong ki.

²¹ Ïaroh ïa U Trai! Katno kiba phylla u pyn-i ka jingieit ïa nga haba nga la shah kerkut bad tur ïaleh!

²² Nga la sheptieng bad nga pyrkhat ba u la beh noh ïa nga na ka jingdon ryngkat jong u. Hynrei u ïohsngew ïa ka jingïam jong nga, haba nga khot kyrpad ïa u ban ïarap.

²³ To ieit ïa U Trai, phi baroh ki riewngeit jong u, U Trai u ïada ïa kiba ngeit, hynrei u pynshitom ïa kiba sarong kumba ki dei hok.

²⁴ To long kiba khlaiñ, to long kiba shlur, phi baroh kiba kyrmen ha U Trai.