SALM 30 - Khasi CL Bible (BSI)

Ka jingduwai sngewnguh

¹ Nga ïaroh ïa me, A Trai, namar me la ri pynim ïa nga bad khang ïa ki nongshun jong nga na kaba leh risa halor jong nga.

² Nga kyang ha me ban ïoh jingïarap, A Trai U Blei jong nga, bad me la pynkhiah ïa nga;

³ me la sumar ïa nga na ka jingtep. Nga la don ha ka lynti shaduh kaba jylliew tam shapoh, hynrei me pynïoh pat ïa ka jingim jong nga.

⁴ To rwai ïaroh ïa U Trai, phi ki briew baroh kiba ïaineh ha u! To kynmaw ïa kaei kaba Uta Uba Khuid u la leh, bad to ainguh ïa u!

⁵ Ka jingbitar jong u ka neh tang shipor, ka jingbha jong u ka neh shi rta. Ki ummat ki lah ban jaw mynmiet, hynrei ka jingkmen ka wan pat mynstep.

⁶ Nga sngewshngain bad ong ha lade, “Ngan ym shahjop lano lano ruh.”

⁷ Me long uba bha ïa nga, A Trai; me la ïada ïa nga kum ka kut u lumbah. Hynrei nangta me buhrieh ïa lade na nga, bad nga la sheptieng.

⁸ Nga khot kyrpad ïa me, A Trai; nga kyrpad ïa ka jingïarap jong me:

⁹ “Kaei kaba men ïohnong na ka jingïap jong nga? Kaei ka jingïohnong na ka jingleit jong nga sha ka jingtep? Hato ki briew ba la ïap ki lah ban ïaroh ïa me? Ki lah ne em ban pynbna ïa ka jingbha baïaineh jong me?

¹⁰ To sngap ïa nga, A Trai, bad long uba isynei! Ïarap ïa nga, A Trai!”

¹¹ Me la pynkylla ïa ka jingsngewsih jong nga sha ka jingshadkmen; me la shim noh ïa ka jingsngewsih jong nga bad kerkut ïa nga da ka jingkmen.

¹² Kumta ngan ym sngap jar; ngan rwai ïaroh ïa me. A Trai, me long U Blei jong nga, ngan ai ka jingsngewnguh ïa me junom.