SALM 29 - Khasi CL Bible (BSI)

Ka sur jong U Trai hapdeng ka 'erïong

¹ Ïaroh ïa U Trai, phi ki paid ka bneng; ïaroh ïa ka burom bad ka bor jong u.

² Ïaroh ïa ka kyrteng badonburom jong U Trai; dem ngon ha khmat Uta Uba Khuid haba un wanpaw.

³ Ka sur jong U Trai ka sawa ha ki duriaw; U Blei badonburom u kyrhuh, bad ka sur jong u ka sawa halor ki duriaw-bah.

⁴ Ka sur jong U Trai ka sawa ha ka bor bad ka jingkhraw jong ka baroh.

⁵ Ka sur jong U Trai ka pynkheiñ ïa ki dieng Kedar, wat ïa ki dieng Kedar jong ka Lebanon.

⁶ U pynlong ïa ki lumbah ka Lebanon ban kynthih kum ki khun masi bad pynlong ïa u Lum Hermon ban ryngkoh kum u masi lyngraw.

⁷ Ka sur jong U Trai ka pynlong ïa ka leilieh ban thaba.

⁸ Ka sur jong u ka pynlong ïa ka ri shyiap ban khynñiuh; u pynkhynñiuh ïa ka ri shyiap Kadesh.

⁹ Ka sur jong U Trai ka pynkhih ïa ki dieng Sning bad pynhap lut ïa ki sla na ki dieng katba uwei pa uwei u dang pyrta ha ka Templ jong u, “Ka burom ïa U Blei!”

¹⁰ U Trai u synshar halor ki um kiba jylliew; u synshar kum u syiem junom.

¹¹ U Trai u ai jingkhlaiñ ïa ki briew jong u bad kyrkhu ïa ki da ka jingsuk.