SALM 27 - Khasi CL Bible (BSI)

Ka jingduwai ka jingïaroh

¹ U Trai u long ka jingshai jong nga bad ka jingpynim jong nga; ngan ym sheptieng ïano ïano ruh. U Trai u ïada ïa nga na ki jingjynjar baroh; ngan ym sheptieng lano lano ruh.

² Haba ki riewsniew ki tur ïaleh ïa nga bad pyrshang ban pynïap ïa nga, ki jynthut bad ki kyllon.

³ Wat lada ka kynhun shipai baroh kawei ka kerkut ïa nga, ngan ym sheptieng; wat lada ki nongshun ki tur ïaleh ïa nga, ngan ïai shaniah ha U Blei.

⁴ Nga la pan na U Trai ïa kawei; tang kawei hi nga kwah: ban shong ha ka ïing U Trai baroh shi rta, ban sngewphylla hangta ïa ka jingbha jong u, bad ban kyrpad ïa ka jingïalam jong u.

⁵ Ha ki por ka jingjynjar un ai jakarieh ïa nga; un sumar khop ïa nga ha ka Templ jong u bad pynlong skhem ïa nga ha u mawsiang bajrong.

⁶ Kumta ngan ïoh jop halor ki nongshun kiba ker sawdong ïa nga. Ryngkat bad ki jingrisa jingkmen ngan ai ki jingkñia ha ka Templ jong u; ngan rwai, ngan ïaroh ïa U Trai.

⁷ To sngew ïa nga, A Trai, haba nga khot kyrpad ïa me! Isynei bad jubab ïa nga!

⁸ Haba me ong, “Wan bad mane ïa nga,” nga jubab, “Ngan sa wan, A Trai; wat buhrieh ïa lade na nga!”

⁹ Wat bitar ïa nga; wat beh noh ïa u shakri jong me. Me la long ka jingïarap jong nga; wat ieh ïa nga, wat iehnoh jynduh ïa nga, A Blei, u nongpynim jong nga.

¹⁰ U kpa bad ka kmie jong nga ki lah ban iehnoh ïa nga, hynrei U Trai un sumar ïa nga.

¹¹ To hikai ïa nga, A Trai, kaei me kwah ïa nga ban leh bad ïalam ïa nga ha ka lynti kaba shngain, namar nga don shibun ki nongshun.

¹² Wat iehnoh ïa nga ha ki nongshun jong nga, kiba tur ïaleh ïa nga ryngkat bad ka lamler bad ka jingbyrngem.

¹³ Nga tip ba ngan im ban ïohi ïa ka jingbha U Trai ha kane ka jingim kaba mynta.

¹⁴ To shaniah ha U Trai, to ngeit, wat duh jingkyrmen. To shaniah ha U Trai.