SALM 26 - Khasi CL Bible (BSI)

Ka jingduwai jong u briew uba bha

¹ To pynbna ba nga long uba lui lui, A Trai, namar nga leh ïa kaba dei bad nga shaniah lut ha me.

² To ïitbniah bad tynjuh ïa nga, A Trai, bishar ïa ki jingkwah bad ki jingmut jong nga.

³ Ka jingieit baneh jong me ka long ka nongïalam jong nga; ka jingïaineh jong me kan ïalam ïa nga borabor.

⁴ Ngam shym ïalang lok bad ki briew bymlarkam; ngam don ei ei ban leh bad ki riewarsap.

⁵ Nga isih ïa ka jingïalumlang ki riewsniew bad nga kiar na ki bymman.

⁶ A Trai, nga sait ïa la ki kti ban pyn-i ba nga long uba lui lui bad nga ïaid sawdong ka duwan ha kaba mane ïa me.

⁷ Nga rwai ka jingrwai ainguh bad ïathuh ha baroh ïa ki kam baphylla jong me.

⁸ Nga ieit ïa ka ïing ha kaba me shong, A Trai, ka jaka ha kaba ka burom jong me ka don.

⁹ Wat pynjot ïa nga lem bad ki nongpop; pyllait ïa nga na ka kupar jong ki nongpynïap briew —

¹⁰ Ki briew kiba leh sniew lynter bad kiba kloi borabor ban shim klop.

¹¹ Hynrei ma nga, nga leh ïa kaei kaba dei; to isynei lem ïa nga bad pynim ïa nga!

¹² Nga la lait na ki jingjynjar baroh; ha ka jingïaseng lang jong ki briew jong u nga ïaroh ïa U Trai.