SALM 25 - Khasi CL Bible (BSI)

Ka jingduwai na ka bynta ka jingïalam bad jingïada

¹ Ha me, A Trai, nga ai ïa ka jingduwai jong nga; ha me, U Blei jong nga, nga shaniah.

² To pyllait ïa nga na ka jinglehrain ka jingshahjop; wat ai ba ki nongshun jong nga kin risa halor jong nga!

³ Ka jingshahjop kan ym wan ha kito kiba shaniah ha me, hynrei ha kito kiba kloi ban ïeng ïaleh pyrshah ïa me.

⁴ To hikai ïa nga ïa ki lynti jong me, A Trai; pynlong ïa nga ban tip ïa ki.

⁵ To hikai ïa nga ban im kat kum ka jingshisha jong me, naba me long U Blei jong nga, uba pynim ïa nga. Nga shaniah borabor ha me.

⁶ To kynmaw, A Trai, ïa ka jingsbun bad ka jingieit baneh jong me, kiba me la pyn-i naduh ki por barim.

⁷ Map ïa ki pop bad ki jingbakla jong ka jinglong samla jong nga. Ha ka jingieit baneh bad jingbha jong me, to kynmaw ïa nga, A Trai!

⁸ Namar U Trai u long uba hok bad uba bha, u hikai ïa ki nongpop ïa ka lynti kaba ki dei ban bud.

⁹ U ïalam ïa kiba sngewrit ha ka lynti ka hok bad hikai ha ki ïa ka mon jong u.

¹⁰ Da ka jingïaineh bad ka jingieit u ïalam ïa baroh kiba sumar ïa ka jutang jong u bad kohnguh ïa ki hukum jong u.

¹¹ To bat ïa ka kular jong me, A Trai, bad map ïa ki pop jong nga, namar ba ki don shibun.

¹² Kito kiba ai burom ïa U Trai kin ïoh jinghikai na u ïa ka lynti kaba ki dei ban bud.

¹³ Kin ïai manbha, bad ki khun jong ki kin ïohkynti ïa ka ri.

¹⁴ U Trai u long u paralok jong kito kiba kohnguh ïa u bad u pynskhem ïa la ka jutang bad ki.

¹⁵ Nga khmih sha U Trai ban ïoh jingïarap ha ki por baroh, bad u pyllait ïa nga na ki jingma.

¹⁶ To phai sha nga, A Trai, bad isynei ïa nga, namar nga long marwei bad tlot.

¹⁷ Pyllait ïa nga na ki jingkhuslai jong nga bad ïada ïa nga na ki jingjynjar jong nga baroh.

¹⁸ To ñiew ïa ki jingjynjar bad jingshitom jong nga bad map ïa ki pop jong nga baroh.

¹⁹ To peit katno ngut ki nongshun nga don; peit haduh katno ki isih ïa nga.

²⁰ To ïada ïa nga bad pynim ïa nga; sumar ïa nga na ka jingshahjop. Nga wan sha me ban ïoh jingshngain.

²¹ Ai ba ka jingbha bad ka hok jong nga kin ïada ïa nga, namar nga shaniah ha me.

²² A Blei, to ïada ïa ki briew jong me ki Israel na ki jingjynjar jong ki baroh!