SALM 24 - Khasi CL Bible (BSI)

U syiem uba khraw

¹ Ka pyrthei bad baroh kiba don ha ka ki dei ki jong U Trai; ka khyndew bad baroh kiba shong ha ka ki dei ki jong u.

² U thaw ïa ka halor ki um kiba jylliew hapoh ram-ew bad pynshong ïa ki nongrim jong ka ha ki jingjylliew ka duriaw-bah.

³ Uei uba dei hok ban leit kiew sha u lum jong U Trai? Uei uba lah ban rung ha ka Templ bakhuid jong u?

⁴ Kito kiba khuid ha ka kam bad ka jingpyrkhat, ki bym shym mane ïa ki bleithaw lane pynlong ki jingkular thala.

⁵ U Trai un kyrkhu ïa ki bad un pynim ïa ki; U Blei un pynbna ba ki long kiba lui lui.

⁶ Kita ki dei ki briew kiba wan sha U Blei, kiba wan sha ka jingdon ryngkat U Blei jong u Jakob.

⁷ To plie wang ïa ki khyrdop, plie ïa ki jingkhang na mynbarim, bad u syiem bakhraw un wan rung.

⁸ Uei une u syiem uba khraw? U dei U Trai, uba khlaiñ bad khrawbor, U Trai, uba jop ha ka thma.

⁹ To plie wang ïa ki khyrdop, plie ïa ki jingkhang na mynbarim, bad u syiem bakhraw un wan rung.

¹⁰ Uei une u syiem uba khraw? U Trai uba jop — u dei u syiem uba khraw!