SALM 23 - Khasi CL Bible (BSI)

U Trai u nongaplangbrot jong ngi

¹ U Trai u long u nongaplangbrot jong nga; nga ïoh ïa kiei kiei baroh kiba nga donkam.

² U shah ba ngan shong jahthait ha ki madan phlang bajyrngam bad u ïalam ïa nga sha ki pung-um basngur kiba jai jai.

³ U ai ha nga ka bor thymmai. U ïalam ïa nga ha ki lynti ka hok, kumba u la kular.

⁴ Wat la nga ïaid lyngba ïa ka jingdum tliw tliw, ngan ym sheptieng, A Trai, namar me don bad nga. U diengduh bad u shanduh aplangbrot jong me ki ïada ïa nga.

⁵ Me pynkhreh ka jingkhawai bah na ka bynta jong nga, ha kaba baroh ki nongshun jong nga kin ïohi ïa nga; me pdiang sngewbha ïa nga kum u nongshahkhot sngewbha badonburom bad pyndap miar ïa ka khuri jong nga.

⁶ Nga tip ba ka jingbha bad jingieit jong me kin don bad nga shi lynter ka jingim jong nga; bad ka ïing jong me kan long ka ïingshong jong nga katba nga dang im.