SALM 22 - Khasi CL Bible (BSI)

Ka jingïam ha ka jingkordit bad ka jingrwai ïaroh

¹ U Blei jong nga, U Blei jong nga, balei ba me iehnoh ïa nga? Nga la kyang tyngeh ban ïoh jingïarap, hynrei haduh mynta kam pat wan.

² Ha ka por mynsngi nga la khot kyrpad sha me, U Blei jong nga, hynrei mem shym la jubab; ha ka por miet nga kyrpad ïa me hynrei ngam ïoh jingjahthait.

³ Hynrei me shongkhet kum uba Bakhuid Tam, uta uba ki Israel ki ïaroh.

⁴ Ki kpa tymmen jong ngi ki buh ka jingshaniah ha me; ki shaniah ïa me, bad me pynim ïa ki.

⁵ Ki khot kyrpad ïa me bad ki lait im na ki jingma; ki shaniah ha me bad kim shym duh jingkyrmen.

⁶ Hynrei ngam dei shuh u briew; nga dei u khñiang, ba la ñiewbeiñ bad isih da baroh!

⁷ Baroh kiba ïohi ïa nga ki krenbeiñ ïa nga; ki sei ïa la ki thylliej bad pynkhih ïa la ki khlieh.

⁸ “Me la shaniah ha U Trai,” ki ong. “Balei um shym la pynim ïa me? Lada U Trai u sngewbha ïa me, balei um shym ïarap ïa me?”

⁹ Dei ma me uba la pyllait ïa nga na ka jingmynsaw ha ka por ba kha ïa nga, bad mynba nga dang long u khunlung, me sumar bha ïa nga.

¹⁰ Nga la shaniah ha me naduh ka sngi ba kha ïa nga, bad me la ju ïailong U Blei jong nga.

¹¹ Wat long jngai na nga! Ka jingjynjar ka don hajan, bad ym don uwei ruh u ban ïarap.

¹² Shibun ki nongshun ki kerkut ïa nga kum ki masi kyrtong; ki don baroh sawdong jong nga, kum ki masi kyrtong ba-itieng na ka ri Bashan.

¹³ Ki ang ïa la ki shyntur kum ki sing, ki kyrhuh bad tar ïa nga.

¹⁴ Ka jingkhlaiñ jong nga ka la duh, ka la leit noh kum ka um kaba hoit ha madan. Baroh ki shyieng jong nga ki lah tor lut; ka dohnud jong nga ka long kum ka bthing ba la um.

¹⁵ Ka ryndang jong nga ka la tyrkhong kum ka khyndew, bad u thylliej jong nga u dambit ha ka bynta ba haneng ha ka shyntur jong nga. Me la ieh ïa nga ban ïap ha ka khyndew.

¹⁶ Ka kynhun ki riewsniew ka don sawdong ïa nga; kum ka kynhun ki ksew, ki don hajan jong nga; ki patar ïa ki kti bad ki kjat jong nga.

¹⁷ Baroh ki shyieng jong nga ki paw lut. Ki nongshun jong nga ki peit sha nga bad ki ang lyngngoh.

¹⁸ Ki ïakhalai ïa ki jaiñ jong nga bad ïasam ïa ki hapdeng jong ki.

¹⁹ A Trai, wat long jngai na nga! Wan kloi ban ïarap ïa nga!

²⁰ To pynim ïa nga na ka waitlam; ïada ïa ka jingim jong nga na kine ki ksew.

²¹ Pyllait ïa nga na kine ki sing; ngam lah leh ei ei ha khmat kine ki masi prut.

²² Ngan ïathuh ïa ki briew jong nga ïa kaei ba me la leh; ngan ïaroh ïa me ha ki jingïaseng lang jong ki.

²³ “To ïaroh ïa u, phi ki shakri jong U Trai! Pyndonburom ïa u, phi ki khun ki ksiew jong u Jakob! To mane ïa u, phi ki paid Israel!

²⁴ Um shym leh klet ïa kiba duk lane leh bymsuidñiew ïa ki jingshitom jong ki; um shym phai lyndet na ki, hynrei u jubab haba ki pan jingïarap.”

²⁵ Ha ka jingïaseng lang ngan ïaroh ïa me ïa kaei ba me la leh; ha ka jingdon ryngkat jong kito kiba mane ïa me ngan ai ki jingkñia ba nga la kular.

²⁶ Kiba duk kin bam katba ki lah; kito kiba wan sha U Trai kin ïaroh ïa u. Ai kin manbha junom!

²⁷ Baroh ki jaitbynriew kin kynmaw ïa U Trai. Na ki bynta baroh jong ka pyrthei kin phai sha u; baroh ki kynja bynriew kin mane ïa u.

²⁸ U Trai u long u Syiem, bad u synshar ïa ki hima.

²⁹ Baroh ki briew kiba sarong kin dem ngon ha u; baroh ki briew kin dem ngon ha khmat jong u.

³⁰ Ki pateng ki ban dang wan kin shakri ïa u; ki briew kin ïathuh shaphang u Trai ha ka pateng ka ban dang wan.

³¹ Ha ki briew ki bym pat shym la kha yn sa ïathuh: “U Trai un pynim ïa ki briew jong u.”