SALM 21 - Khasi CL Bible (BSI)

Ka jingïaroh namar ka jingjop

¹ U Syiem u sngewbha, A Trai, namar me ai ha u ïa ka jingkhlaiñ; u lehkmen namar me ai ha u ïa ka jingjop.

² Me la ai ha u ïa ka jingkwah ka dohnud jong u; me la jubab ïa ka jingkyrpad jong u.

³ Me wan sha u bad ki jingkyrkhu kiba khraw bad pynphong da ka pansngiat ksiar halor ka khlieh jong u.

⁴ U pan ïa ka jingim bad me ai ïa ka, ka jingim kaba jlan bad kaba neh.

⁵ Ka burom jong u ka khraw namar ka jingïarap jong me; me la ai ha u ïa ka nam bad ka main longsyiem.

⁶ Ki jingkyrkhu jong me ki don bad u junom bad ka jingdon ryngkat jong me ka pyndap ïa u da ka jingkmen.

⁷ U syiem u shaniah ha U Trai Badonbor Baroh; bad namar ka jingieit baneh jong U Trai un ïailong borabor ha ka jingshngain.

⁸ U syiem un ïohkem ïa ki nongshun jong u baroh, un ïohkem ïa uwei pa uwei uba isih ïa u.

⁹ Un pynjot ïa ki kum ka ding kaba klang haba u wanpaw. U Trai un pynduh khoit ïa ki ha ka jingbitar jong u, bad ka ding kan bam duh ïa ki.

¹⁰ Yn ym don uwei ruh na ki khun ki ksiew jong ki, ki ban lait im; u syiem un pynïap ïa ki baroh.

¹¹ Ki pyrkhat ïa ki buit jong ki bad thmu sniew pyrshah ïa u, hynrei kin ym lah ban jop.

¹² Un siat ïa ki khnam ha ki bad pynlong ïa ki ban phai noh bad phet.

¹³ Ngi ïaroh ïa me A Trai, namar ka jingkhlaiñ bakhraw jong me! Ngin rwai bad ïaroh ïa ka bor jong me.