SALM 20 - Khasi CL Bible (BSI)

Ka jingduwai ban ïoh ïa ka jingjop

¹ Ai ba U Trai un jubab ïa me haba me don ha ka jingjynjar! Ai ba U Blei jong u Jakob un ïada ïa me!

² To un phah ha me ïa ka jingïarap na ka Templ jong u bad ai ha me ka jingïarap na u Lum Seïon.

³ To un pdiang ïa ki jingainguh jong me baroh, bad un sngewbha ïa ki jingkñia jong me baroh.

⁴ To un ai ha me ïa ka kaei kaba me kwah bad pynurlong ïa ki jingthmu jong me baroh.

⁵ Te ngin risa da ka jingkmen halor ka jingjop jong me bad lehkmen ïa ka jingjop jong me da kaba ïaroh ïa U Blei jong ngi. To U Trai un jubab ïa ki jingkyrpad jong me baroh.

⁶ Mynta nga tip ba U Trai u ai ka jingjop ha u syiem ba la jied jong u; u jubab ïa u na ka bneng bakhuid jong u bad da ka bor jong u, u ai ha u ki jingjop kiba khraw.

⁷ Katto katne ki shaniah ha ki kali ïapom jong ki bad kiwei pat ha ki kulai jong ki, hynrei ngi, ngi shaniah ha ka bor jong U Trai U Blei jong ngi.

⁸ Kiba kum kine ki briew kin jynthut bad kyllon, hynrei ngi, ngin khie bad ngin ïeng skhem.

⁹ To ai ka jingjop ïa u syiem, ko Trai; to jubab ïa ngi haba ngi khot kyrpad.