SALM 2 - Khasi CL Bible (BSI)

U Syiem ba la jied jong U Blei

¹ Balei ki jaitbynriew ki thmu ban ïaleh pyrshah? Balei ki briew ki pynlong ïa la ki jingsylla bymmyntoi?

² Ki syiem jong ki, ki ïeng pyrshah, ki nongsynshar jong ki, ki ïasylla lang pyrshah ïa U Trai bad pyrshah ïa u syiem uba u la jied.

³ “To ngin pyllait ïa lade na ka jingsynshar jong ki,” ki ong; “to ngin bret noh ïa ka jingsynshar jong ki.”

⁴ Na ka khet jong u ha bneng U Trai u rkhie u rkhiebeiñ ïa ki jingthmu batlot jong ki.

⁵ Nangta u maham ïa ki ha ka jingbitar bad u pyntriem ïa ki da ka jingbitar shla jong u.

⁶ “Ha Seïon, u lum bakyntang jong nga,” u ong, “nga la thung ïa u syiem jong nga.”

⁷ “Ngan pynbna,” ong u syiem, “ïa kaei kaba U Trai u la pynbna. U ong ha nga: ‘Me long u khun jong nga; ha kane ka sngi nga la long u kpa jong me.

⁸ To pan, bad ngan ai ha me ïa ki jaitbynriew baroh; ka pyrthei baroh kawei kan long ka jong me.

⁹ Men pynkheiñ ïa ki da u diengduh nar; men pynpra ïa ki lyngkhot lyngkhai kum ïa u khiew khyndew.’”

¹⁰ Mynta to shahshkor ïa kane ka jingmaham, ma phi ki syiem; to ïoh jinghikai na kane, phi ki nongsynshar jong ka pyrthei.

¹¹ Shakri ïa U Trai da ka jingsheptieng;

¹² to khynñiuh bad to nguh dem ïa u, lym kumta ïa ka jingbitar jong u yn pynkhie kynsan, bad phin ïap kyndit. Suk kita baroh kiba leit sha u ban ïoh ka jingïada.