SALM 19 - Khasi CL Bible (BSI)

Ka burom U Blei ha ka jingpynlong

¹ Haduh katno ka sahit bneng ka pynpaw shai kdar ïa ka burom jong U Blei! Haduh katno ka pynpaw sngur ïa kaei kaba u la leh!

² Kawei pa kawei ka sngi ka pynbna ïa ka ha ka sngi kaba bud; bad kawei pa kawei ka miet ka ïai ban ïa ka ha kaba bud.

³ Ym shym la pyndonkam ïa ka jingkren lane ïa ki kyntien, ym shym la ïohsngew ïa kano kano ka jingsawa;

⁴ pynban ka khubor jong ki ka leit sha kylleng ka pyrthei bad la ïohsngew ha kiba kut jong ka pyrthei. U Blei u thaw ka ïing ha ka sahit bneng na ka bynta ka sngi;

⁵ ka wan mih mynstep kum u nongleitkurim uba kmen, kum u nongmareh uba angnud ban mareh ïa ka jingmareh thong.

⁶ Ka sdang na kawei ka tduh jong ka suiñbneng bad ka ïaid sha shiliang sha kawei pat ka tduh. Ym don kano kano kaba lah ban buhrieh na ka jingkhluit jong ka.

Ka Aiñ jong U Trai

⁷ Ka aiñ jong U Trai ka long kaba janai, ka ai ka jingkhlaiñ kaba thymmai. Ki hukum jong U Trai ki long kiba lah ban shaniah, kiba ai jingstad ha kito ki bym don ïa ka.

⁸ Ki aiñ ki jong U Trai ki long kiba dei, bad kito kiba kohnguh ïa ki, ki kmen. Ki hukum jong U Trai ki long kiba hok bad ki ai jingshemphang ïa ka jingmut.

⁹ Ka jingñiewburom ïa U Trai ka long kaba bha; kan ïai bteng junom. Ki jingbishar jong U Trai ki long kiba hok; ki long borabor kiba beit.

¹⁰ Ki long kiba kham ikwah ban ïa ka ksiar kaba nylla; ki long kiba kham thiang ban ïa ka ngap kaba sngur eh.

¹¹ Ki ai jingtip ïa nga, u shakri jong me; la ainong ïa nga namar ka jingkohnguh ïa ki.

¹² Ym don uno uno uba lah ban ïohi ïa ki jingbakla la jong; to pyllait ïa nga, A Trai, na ki jingbakla barieh!

¹³ To sumar ïa nga ruh na ki pop leh khnang; wat shah ïa ki ban synshar halor jong nga. Te ngan long uba janai bad lait na ka jingsniew jong ka pop.

¹⁴ To ai ba ki kyntien jong nga bad ki jingpyrkhat jong nga kin long kiba la pdiang hun ha me, A Trai, me long ka jakarieh jong nga bad u nongsiewspah jong nga!