SALM 18 - Khasi CL Bible (BSI)

Ka jingrwai jingjop jong u Dabid

¹ Katno nga ieit ïa me, A Trai! Me long u nongkyrshan jong nga.

² U Trai u long u nongïada jong nga; u long ka kut baskhem jong nga. U Blei jong nga u long ka jingïada jong nga, bad ha u nga sngewshngain. U da ïa nga kum ka stieh; u kyrshan ïa nga bad u ri pynim ïa nga.

³ Nga khot kyrpad ïa U Trai, bad u pyllait im ïa nga na ki nongshun jong nga. Ïaroh ïa U Trai!

⁴ Ka jingma jong ka jingïap ka don baroh sawdong jong nga; ki jingat phyllung ka jingjot ki la lynshop ïa nga.

⁵ Ka jingma jong ka jingïap ka la don sawdong jong nga, bad ka jingtep ka la pynap ïa la ka jingriam ïa nga.

⁶ Ha ka jingjynjar jong nga, nga la khot kyrpad ïa U Trai; Nga la khot kyrpad ïa U Blei jong nga ban ïoh jingïarap. Ha ka Templ jong u, u la ïohsngew ïa ka sur jong nga, bad u la shahshkor ïa ka jingkyang jong nga ban ïoh jingïarap.

⁷ Nangta ka khyndew ka la khynñiuh bad ka la khih; ki nongrim jong ki lumbah ki la khynñiuh bad kyiuh, namar ba U Blei u la bitar.

⁸ Ka tdem ka la mih na ki thliew khmut jong u, bad ka ding kaba bam duh bad ki rnga kiba rhem na ka shyntur jong u.

⁹ U la kad arliang ïa ka suiñbneng bad u la wan hiar bad u lyoh uba dum hapoh ki sla kjat jong u.

¹⁰ U her stet halor jong u kherub; u la leit halor ki thapniang jong ka lyer.

¹¹ U tap ïa lade da ka jingdum; ki lyoh kiba rben, kiba dap da ka um, ki ker sawdong ïa u.

¹² Ki phria bad ki jingthaba jong ka ding ki wan mih na ka leilieh ha khmat jong u bad ki sam lyngba ïa ki lyoh ba-dum.

¹³ Nangta U Trai u la kyrhuh na ka suiñbneng; bad ïa ka sur jong U Bahakhlieh Tam Eh la ïohsngew.

¹⁴ U siat ïa la ki khnam bad u pynsakma ïa ki nongshun jong u; da ka jingthaba ka leilieh u pynher krad ïa ki.

¹⁵ Ïa ka trai duriaw la pynlyngkhuit, bad ïa ki nongrim ka khyndew la pynpaw, haba me la sneng tyngeh ïa ki nongshun, A Trai, bad me byrthen ïa ki ha ka jingbitar.

¹⁶ U Trai u kner sha tbian najrong, bad u batskhem ïa nga; u sei ïa nga na ki um kiba jylliew.

¹⁷ U la pyllait im ïa nga na ki nongshun kiba khlaiñ jong nga, bad na kito baroh kiba isih ïa nga — ki long kiba khlaiñbor palat ïa nga.

¹⁸ Haba nga don ha ka jingjynjar, ki la tur ïaleh ïa nga, hynrei U Trai u la ïada ïa nga.

¹⁹ U la ïarap ïa nga na ka jingma; u pyllait im ïa nga namar ba u la sngewbha ïa nga.

²⁰ U Trai u ainong ïa nga namar nga leh ïa kaba dei; u kyrkhu ïa nga namar ba nga long uba lui lui.

²¹ Nga la kohnguh ïa ka hukum jong U Trai; ngam shym la phai noh na U Blei jong nga.

²² Nga la bat ïa ki aiñ jong u baroh; ngam shym la pynkheiñ ïa ki hukum jong u.

²³ U tip ba ngam don jingbakla ei ei, ba nga la sumar ïa lade na kaba leh bakla.

²⁴ Bad kumta u ainong ïa nga namar ba nga leh ïa kaba dei, namar u tip ba nga long uba lui lui.

²⁵ A Trai, me long uba ïaineh ha kito kiba ïaineh ha me; uba bha nadong shadong ïa kito kiba janai.

²⁶ Me long uba khuid ha kito kiba khuid, hynrei me kyntait ïa kito kiba long bymman.

²⁷ Me pyllait im ïa kito kiba sngewrit, hynrei me pynhiar ïa kito kiba sarong.

²⁸ A Trai, me ai ha nga ka jingshai; me pynjah ïa ka jingdum jong nga.

²⁹ Me ai ha nga ka jingkhlaiñ ban tur ïaleh ïa ki nongshun jong nga bad ka bor ban jop ïa ki jingïada jong ki.

³⁰ Une U Blei — katno kiba janai long ki kam jong u! Katno ki ktien jong u ki long kiba lah ban shaniah! U long kum ka stieh ïa kito baroh kiba wad ïa ka jingïada jong u.

³¹ Tang U Trai hi u long U Blei; tang U Blei hi u long u nongkyrshan jong ngi.

³² U long U Blei uba pynlong khlaiñ ïa nga, uba pynshngain ïa ka lynti ïaid jong nga.

³³ U pynlong skhem ïa nga kum ka skei; u sumar ïa nga halor ki lumbah.

³⁴ U hikai ïa nga ban ïaleh thma, ba kumta nga lah ban pyndonkam ïa ka ryntieh kaba khlaiñ tam.

³⁵ A Trai, me ïada ïa nga bad pynim ïa nga; ka jingsumar jong me ka la pynlong ïa nga uba khraw, bad ka bor jong me ka la sumar ïa nga.

³⁶ Me la sumar ïa nga ban ym shah kem, bad ngam shym la kyllon.

³⁷ Nga beh kthong ïa ki nongshun jong nga bad nga kem ïa ki; ngam shym sangeh tad ynda nga pynjot thiaw ïa ki.

³⁸ Nga tied pynkyllon ïa ki, bad kim lah shuh ban khie; ki kyllon ha ka jingshahjop ha khmat jong nga.

³⁹ Me ai ha nga ka jingkhlaiñ ban ïaleh thma bad ka jingjop halor ki nongshun jong nga.

⁴⁰ Me pynlong ïa ki nongshun jong nga ban phet na nga; nga pynjot ïa kito kiba isih ïa nga.

⁴¹ Ki kyang ban ïoh jingïarap, hynrei ym don mano mano ba pyllait im ïa ki; ki khot kyrpad ïa U Trai, hynrei um jubab.

⁴² Nga khñiot ïa ki, ba kumta kin long kum u pui pui uba la rong noh da ka lyer. Nga ïuh halor jong ki kum ïa ka ktieh ha ki lynti.

⁴³ Me la pyllait im ïa nga na ka kynhun bynriew kaba ïaleh pyrshah, bad me pynlong ïa nga u nongsynshar halor ki jaitbynriew; ki jaitbynriew kiba ngam ithuh ki la long mynta ki raïot jong nga.

⁴⁴ Ki nongwei ki dem ngon ha khmat jong nga; haba ki ïohsngew ïa nga, ki kohnguh.

⁴⁵ Ki la duh ïa ka jingshlur jong ki, bad ki wan da ka jingkhynñiuh na ki kut jong ki.

⁴⁶ U Trai u im! To ïaroh ïa u nongïada ïa nga! To pynbna ïa ka jingkhraw jong U Blei uba pynim ïa nga.

⁴⁷ U ai ha nga ka jingjop halor ki nongshun jong nga; u pyndem ïa ki jaitbynriew hapoh jong nga,

⁴⁸ bad u pyllait im ïa nga na ki nongshun jong nga. A Trai, me ai ha nga ka jingjop halor ki nongshun jong nga bad me ïada ïa nga na ki briew kiba lehbor.

⁴⁹ Bad kumta nga ïaroh ïa me hapdeng ki jaitbynriew; nga rwai ki jingïaroh ïa me.

⁵⁰ U Blei u ai ki jingjop kiba khraw ha u syiem jong u; u pynpaw ïa ka jingieit kaba neh ha uta uba u la jied, ha u Dabid bad ha ki khun ki ksiew jong u junom.