SALM 17 - Khasi CL Bible (BSI)

Ka jingduwai u briew uba lui lui

¹ To shahshkor, A Trai, ïa ka jingkyrpad jong nga ïa ka jingbishar hok; to sngap ïa ka jingkyang jong nga ban ïoh jingïarap! To shahshkor ïa ka jingduwai sngur mynsiem jong nga.

² Men bishar da kaba sngewlem ïa nga, namar me tip kaei kaba dei.

³ Me tip ïa ka dohnud jong nga. Me la wan ha nga ha ka por miet; Me la ïitbniah ïa nga nadong shadong bad men shym la shem kano kano ka jingkwah basniew hapoh jong nga.

⁴ Ngam kren sniew kumba kiwei pat ki leh; nga la kohnguh ïa ka hukum jong me, bad ngam shym bud ïa ki lynti ka jingleh jubor.

⁵ Nga la ïaid borabor ha ka lynti jong me, bad ngam shym la sakma noh na ka.

⁶ Nga duwai ha me, A Blei, namar me jubab ïa nga; kumta to phai sha nga bad sngap ïa ki kyntien jong nga.

⁷ Pyni ïa ka jingieit baphylla jong me bad to pynim ïa nga; ha ka liang jong me nga lait im na ki nongshun jong nga.

⁸ To ïada ïa nga kumba me leh ïa la ki jong ki khmat; buhrieh ïa nga ha ka jingkah ki thapniang jong me

⁹ na ki jingtur ïaleh jong ki bymman. Ki nongshun bashyrkhei ki ker sawdong ïa nga;

¹⁰ kim don jingisynei, bad ki kren sarong.

¹¹ Ki don sawdong jong nga mynta, kat shaba nga phai, ki da khmih ïa ka lad ban pynkyllon ïa nga.

¹² Ki long kum ki sing, ki da apthap ïa nga, ki da kwah ban patar lyngkhot lyngkhai ïa nga.

¹³ To wan, A Trai! To ïaleh pyrshah ïa ki nongshun jong nga bad to jop ïa ki! To pyllait im ïa nga na ki bymman da ka waitlam jong me;

¹⁴ pynim ïa nga na kito kiba ha kane ka pyrthei ki don lut ïa kaba ki kwah. Pynshitom ïa ki da ki jingshitom kiba me la kynton na ka bynta jong ki; Ai ba kan dap na ka bynta ki khun ki kti jong ki bad katto katne kaba sah na ka bynta ki khun jong ki khun jong ki!

¹⁵ Hynrei nga, ngan ïohi ïa me, namar ngam shym leh kaei kaei kaba bakla; bad haba nga kyndit, ka jingdon ryngkat ka jong me kan pyndap ïa nga da ka jingkmen.